Beirniaid yr Eisteddfod eleni oedd: Cerdd - Garth Hughes Jones, Caernarfon; Alaw Werin a Cherdd Dant - Gwenan Gibbard, Pwllheli; Llefaru, Llên a Barddoniaeth - Alun Jones, Bow Street; Celf ac Arlunio - Eleri Davies, Llanegryn a Tony Jeffs, Bermo a'r cyfeilydd medrus oedd Tudur Jones, F.R.C.O., Tywyn.

Diolch i'r cyfeilydd a'r beirniaid am eu gwaith. Y ddwy arweinyddes a wnaeth yn siŵr fod yr Eisteddfod wedi rhedeg mor hwylus o 11 o'r gloch, bore Sadwrn, hyd at 1 o'r gloch boreSul oedd Janet Pugh ac Avril Micah, y ddwy o Lanegryn. Diolch iddynt am eu gwaith caled.

Cadeirydd y Pwyllgor Gwaith, Sulwyn Jones a gafodd y pleser a'r anrhydedd o groesawu achyflwyno y llywyddion a chafwyd areithiau difyr, doniol iawn gan y ddwy yn hel atgofion am yr amser a dreuliasant yn Llanegryn, sef Anwen Williams, Tywyn, y prynhawn a Mrs Myron Lloyd, Llanbedr, Dyffryn Clwyd, yr hwyr.

Diolchodd y Cadeirydd i'r ddwy am eu geiriau caredig ac atgofion melys a'u rhoddion gwerthfawr tuag at y gronfa. Noddwyd y gadair eleni gan fanc H.S.B.C a gwerthfawrogwn eu haelioni yn fawr.

Enillwyd y gadair am gerdd ar y testun 'Braint' gan Mr T. Graham Williams, "Cefnfab" oRhiw Fawr, Abertawe. Gŵr cynhyrchiol iawn yn y byd llenyddol yn Gymraeg a Saesneg, sydd bellach wedi ennill dros hanner cant o gadeiriau a sawl coron Eisteddfodol. Mae hefyd yn adroddwr dawnus. Wedi'r seremoni bu'n gwerthu ei lyfr diweddaraf "Hunaniaeth Gymreig" ac yn garedig iawn cyfrannu cyfran o bris y llyfr i gronfa'r Eisteddfod. Yr ydym yn dra diolchgar iddo.

Yn ystod seremoni'r cadeirio seiniwyd y corn gwlad yn eu ffordd ddi-guro eu hun gan Mr Lewis Hughes, Tywyn ac yr oedd yn werth bod yno i wrando ar Mrs Mair Roberts yn canu cân y cadeirio. Cyrchwyd y bardd i'r llwyfan gan Catrin, Cae Du a Meinir, Glanmachlas. Fe'i cyfarchwyd gan Mr Carroll Hughes a Sulwyn Jones - Mrs Janet Pugh oedd yng ngofal y seremoni. Mrs Beryl Jones, Nant Madyn a'i thîm o ferched gweithgar ofalodd fod lluniaeth ar gael i bawb.

Diolch i'r merched am eu gwaith caled drwy'r dydd a rhaid yw diolch a chanmol y dynion am eu gwaith hwythau o stiwardio drwy'r dydd. Diolch i Mair Rees am addurno y llwyfan ac ati ac i John Mei Richards am ofalu fod baner Y Ddraig Goch yn chwifio wrth y Neuadd. Diolch i bawb a ddaeth i gefnogi, i gystadlu neu fwynhau gwrando ac i bawb arall a gyfrannodd mewn unrhyw fodd er lles llwyddiant yr Eisteddfod. A diolch yn arbennig i Mr Len Jones, Tywyn am ei rodd o gwpan arian gwerthfawr i enillydd yr unawd Cymraeg. Diolch i bawb am bopeth.

Swyddogion y pwyllgor ydy: Cadeirydd - Sulwyn Jones, Fronhaul; Is-gadeirydd - Mair Rees, Bryncrug; Trysorydd - Miss Jean Bennett, Tywyn; Is-drysorydd - Mrs Gwenan Roberts, Rhoslefain; Ysgrifenyddion - Mrs Bethan Davies, Waenfach a Mrs Avril Micah, Glanmorfa Mawr. Diolch i'r swyddogion a holl aelodau'r pwyllgor am eu gwaith trefnus drwy gydol y flwyddyn.