Un o'r achlysuron hynny fydd perfformiad o The Armed Man gan Karl Jenkins, cyfansoddiad arbennig ar gyfer corau. Mae'n ymwneud ag effaith rhyfel ac mae wedi ei gysegru i ddioddefwyr argyfwng Kosovo. Bydd y perfformiad cyntaf rywbryd yn y flwyddyn newydd.

"Roedd mwyafrif o aelodau'r côr yn perthyn i'r hen gôr," eglurodd Marion. "Ond mae sawl aelod newydd wedi ymuno hefyd. Efallai y byddai Côr Bro Dysynni a Ffrindiau yn well enw arno erbyn hyn."

Cafodd yr hen gôr lwyddiant ysgubol dros y blynyddoedd ac fe enillodd yn yr Eisteddfod Genedlaethol droeon. 1989 oedd y flwyddyn orau un, fodd bynnag, gan i'r côr ennill yn y Genedlaethol yn Llanrwst ac wedyn yng Ngŵyl Gorawl Cymru yng Nghorwen.

Mae tua 50 o aelodau yn perthyn i'r côr ac un o'r hen ffyddloniaid fydd yn cyfeilio iddo eto, sef Tudur Jones.