Ers blynyddoedd bellach mae nifer y bobl sy'n helpu i gyhoeddi'r papur wedi gostwng, yn gymaint, felly, nes ein gorfodi i ddileu noson y gosod a throi at dechnoleg. Mae'n debyg mai dyna fyddai wedi digwydd hyd yn oed pe bai'r un nifer yn cyfarfod ar y bedwaredd nos Fawrth i roi'r papur wrth ei gilydd. Serch hynny, rhaid cyfaddef ein bod wedi colli noson gymdeithasol wirioneddol ddifyr wrth ddisodli pobol efo'r cyfrifiadur.

Na, dydy pethau ddim yn mynd yn haws - ond rydym yn dal i fynd. Yn wir, cawsom hwb fach yn ystod y misoedd diwethaf drwy i rai o bobl ifanc y fro ymuno â'r tîm a gwneud cyfraniad gwerthfawr iawn i sicrhau dyfodol y papur. Serch hynny, mae angen i fwy o ieuenctid y fro ymuno â'r tîm. Dyma'r unig ffordd y gallwn sicrhau y bydd Dail Dysynni yn goroesi am chwarter canrif arall.

Yn y cyfamser dymuna'r criw bach ohonom sy'n cyfarfod yn rheolaidd ar y drydedd nos Fawrth o'r mis ddiolch o galon i bawb sy'n cynorthwyo mewn unrhyw fodd i gyhoeddi'r papur. Gadewch i ni lawenhau: rydym yn dathlu penblwydd arbennig. Ymfalchïwn! A chofiwch :Er gwaethaf pawb a phopeth Ryn ni yma o hyd!

CROESO
Rhan o gywydd y diweddar Merfyn Jones ar enedigaeth y Dail yn 1979.

Heddiw "baban" a anwyd;
Nid rhyw fwbach llegach llwyd;
Di-lestair gowlaid lysti
Heb un nam yw'n babi ni.
Heb angen pram na mamaeth;
Hwn nid yw flin; nid yf laeth;
Hynod grwt, un llon di-gri,
Di-swn yw Dail Dysynni.
(Ni raid gwarchod na chodi
Yn y nos i'n "baban" ni).
Un o frid hen dderi'r fro
Yn ein dolydd sy'n deilio.
Gresyn fai bod heb groeso
I rywun del fel y fo!
Eiddunwn i hwn bob hwyl,
A hygar hynt ddiegwyl.
Llanwer ei ddail â lluniau
O'n pobl ac â chlecs ein pau.

Tad y Dail
Y diweddar R. Emyr Jones (uchod) y gwr a wnaeth y fwyaf i sefydlu'r Dail ac i sicrhau ei lwyddiant dros y blynyddoedd. Yn ogystal â bod yn olygydd am flynyddoedd lawer bu hefyd yn ysgrifennydd ac yn ohebydd dros dref Tywyn.