Ar fore Sadwrn, y trydydd o Ebrill, aeth tua dwsin ohonynt i fyny i gopa Cader Idris gan gario gyda hwy faner y gwersyll. Yna, gyda'r nos, daeth pawb at ei gilydd i wledda a hel atgofion yng ngwesty'r Corbett Arms yng nghwmni Maer Tywyn, Eileen Ellis.

Dau o'r gwahoddedigion oedd Roy Rowlands a Glyn Kirkham, oedd yn hyfforddwyr gyrru yn y gwersyll ar y pryd "Mae cyswllt y fyddin â Thywyn yn mynd yn ôl cyn belled â'r ddeunawfed ganrif," eglurodd Roy, "ac roedd garsiwn yma yn ystod yr Ail Ryfel Byd." Yna, fe gaewyd y prif wersyll yn ystod y 50au cyn ei ail agor ar gyfer y Junior Leaders. Hufen milwyr ifanc Prydain oedd y rhain oedd wedi eu dewis yn fwriadol ar gyfer eu hyfforddi i fod yn arweinyddion milwrol.

Roedd cau'r gwersyll ar ddiwedd y 60au yn ergyd fawr i'r ardal gan i 269 o bobl leol golli eu swyddi. Y tro diwethaf i'r gwersyll gael ei ddefnyddio oedd i gartrefu y ffoaduriaid o Uganda ar ddechrau'r 70au. Ers hynny, mae popeth wedi diflannu a'r tir wedi ei adfer i ddefnydd amaethyddol.

Un arall a fu'n gweithio yn y gwersyll oedd Deanna Angell o Fryncrug a bu'r aduniad yn gyfle arall iddi gyfarfod â hen ffrind, Carol Moore sydd bellach yn byw yng Nghaerlŷr. Mae'r ddwy wedi cysylltu â'i gilydd yn gyson ers cau'r gwersyll ond, fel yr eglurodd Deanna: "Mae'n braf iawn cael cyfarfod â hen gyfeillion ar unrhyw amser." Os caiff trefnwyr ad-uniad eleni eu dymuniad, fe gânt gyfarfod yn flynyddol o hyn allan.