a) trefnu i'w pensiwn gael ei dalu i mewn i gyfrif cyfredol yn y banc.
b) agor cyfrif banc sylfaenol y gellir codi arian allan ohono yn rhad ac am ddim.
c) agor cyfrif arbennig yn y Swyddfa Bost. Dim ond taliadau arbennig megis y pensiwn fydd yn cael eu talu i mewn i hwn ond fe fydd hi'n bosib tynnu arian allan ohono yn rhad ac am ddim.

Yr ofn mawr drwy'r wlad ynglyn â'r fath newid ydy y bydd pobl yn dewis cefnu ar y Swyddfa Bost ac yn gofyn am gael eu pensiwn wedi ei dalu i gyfrif banc. Dydy'r ofn hwn ddim yn poeni cymaint arnom ni yma ym Mro Dysynni am y rheswm syml fod y swyddfeydd post yn ein pentrefi wedi cau ers blynyddoedd (ar wahan i Aberdyfi a Llwyngwril). Ond mae yna berygl y gall y swyddfa bost yn y ddau bentref hwn gau ac y bydd cwtogi dirfawr ar oriau agor y post yn Nhywyn.

Bu gohebydd y DAIL yn trafod y mater gyda rhai o drigolion yr ardal a dyma beth oedd eu hymateb.

Pam na all y llywodraeth adael pethau i fod? gofynnodd Glenys Jones o Fryncrug. Dydy hen bobl ddim yn hoffi newid a chan fod sustem y llyfr pensiwn yn gweithio'n foddhaol doedd dim angen ymyrryd â dim. Dyma'r unig beth sy'n tynnu ambell un allan o'r ty: y ffaith fod yn rhaid picio i'r post i godi'r pensiwn.

Yn sicr, mae sôn am gerdyn sweip a rhif PIN yn ddigon â chodi dychryn ar sawl pensiynwr.

Fydd y newid yn amharu dim ar ambell un, fodd bynnag, gan eu bod nhw eisoes wedi trefnu i'w pensiwn gael ei dalu i'w cyfrif banc.

Mae o'n mynd yn syth i mewn i'm cyfrif banc ac mi fydda inna'n tynnu arian allan ohono pryd a phan y bydda i eu hangen nhw.Cytunai Idwal Evans o Dywyn ag o.

Pam dylwn i giwio yn y Swyddfa Bost unwaith yr wythnos i godi fy mhensiwn tra y gallwn i drefnu iddo gael ei dalu i'r banc unwaith y mis?

Beth am y bobl hynny sydd mewn cartref i'r henoed? Faint o drafferth fydd y newid yn ei achosi iddyn nhw? Dim, yn ôl Glenys Allen, y matron yng nghartref y Bae yn Nhywyn.

Rydan ni'n gorfod bod yn ofalus iawn wrth drin arian y bobl sy'n aros efo ni ac o'r herwydd mae eu pensiwn nhw yn cael ei dalu i mewn i'r banc ers blynyddoedd.

Mae Edith Stephenson, y Bostfeistres yn Nhywyn, yn poeni yn arw am oblygiadau'r newid.

Rydan ni wedi gweld newid yn barod yn ystod wythnosau cyntaf y sustem newydd, meddai. Mae amryw o'r pensiynwyr sydd wedi derbyn llythyr gan y llywodraeth wedi dewis cefnu ar y Swyddfa Bost a threfnu i'w pensiwn gael ei dalu i gyfrif banc.

Ydy pobl yn sylweddoli, tybed, bod modd talu'r pensiwn i gyfrif yn y Swyddfa Bost ac nad oes raid ei roi mewn cyfrif banc?

Mae'n amheus gen i ydy pawb yn sylweddoli hyn, meddai Edith. Fe ddigwyddodd rhywbeth tebyg efo budd-dal plant gydag amryw o famau yn cefnu ar y Swyddfa Bost am y rheswm syml nad oedden nhw wedi deall y gallen nhw ddal i godi'r budd-dal yno. Mae'n bwysig bod pobl yn sylweddoli y gallwn ni yn y Swyddfa Bost gynnig gwasanaeth bancio iddyn nhw.

Mae sôn am gael un o reolwyr y Swyddfa Bost i fynd o gwmpas cymdeithasau fel y W.I. a Merched y Wawr i egluro yn union i bobl beth sy'n digwydd a pha ddewis sydd ganddyn nhw. Ychydig yn hwyr yn y dydd, efallai, o gofio fod y drefn newydd yn bodoli i rai pensiynwyr yn barod.

Beth bynnag a ddigwydd, mae'n bwysig cofio un peth: does dim angen i neb boeni gormod ar gownt y newid. Mi fydd pensiynau pobl yn saff pa gynllun bynnag fyddan nhw yn ei ddewis. Ac os ydy pensiynwyr yn dal mewn penbleth, piciwch draw i'r Swyddfa Bost a gofynnwch i'r staff yno egluro y sustem newydd i chi. Fe fyddan nhw yn falch o wneud hynny.