Roedd hi'n fore hyfryd o Hydref pan ddaeth criw bychan o aelodau Cymdeithas Mabolgampau Meirionnydd ynghyd a chynrychiolwyr lleol y campau a'r Cyngor Cymuned at ei gilydd ar Gae Chwarae Bryncrug i ddadorchuddio cofeb i'r diweddar John Robertson.

Lluniwyd y gofeb, sydd ar ffurf mainc o lechfaen ardal Trawsfynydd, gan gwmni Mr Gwyn Williams Bronaber.

Fe'i lleolir mewn man pwrpasol iawn oddi mewn i'r cae - man lle treuliodd John oriau lawer o'i amser rhydd fel rheolwr y tîm peldroed lleol ac fel hyfforddwr a mentor degau o blant yr ardal dros y blynyddoedd.

Cyflwynwyd y gofeb gan y Gymdeithas er gwerthfawrogiad o'i wasanaeth clodwiw i hybu'r campau yn lleol yn ogystal ag yng Ngogledd a Chanolbarth Cymru.

Maureen, ei wraig, gafodd y fraint o'i dadorchuddio a braf oedd cael cwmni'r merched, Heather a Fiona, sy'n gefn mawr i'w mam.

Buddug Llwyd Jones, Llwyngwril, Cadeirydd y Gymdeithas, fu'n gyfrifol am lywio'r seremoni a mynegwyd diolch a gwerthfawrogiad y teulu a'r gymuned leol gan y cynghorydd Arwel Pierce.