Yn wir, mae nifer ohonoch wedi cael cyfle i blannu rhai o'r coed eich hunain.

Ar hyn o bryd, fe welwch y ddarpar goedwig yn drwch o 'flewiach' gwynion ar wasgar i fyny'r llethr, gan mai mewn tiwbiau plastig mae'r coed ifainc wedi cael eu plannu.

Pwrpas y tiwbiau yw gwarchod y coed rhag llystyfiant megis gwair hir a all eu mygu wrth iddynt dyfu. Fe fyddwn yn tynnu'r tiwbiau unwaith i'r coed dyfu'n ddigon cryf.

Efallai eich bod yn ei chael yn anodd dychmygu Coed Ysgubor Wen fel ag y bydd yn gorchuddio'r rhan hon o ddyffryn Dysynni.

Rydym yn ffyddiog y daw coedwig collddail hardd i gyfoethogi'r cyffiniau ymhen nifer o flynyddoedd.

Y gobaith yw y bydd plant i ddisgyblion presennol Ysgol Llanegryn, sydd wedi torchi'u llewys i balu tyllau ar gyfer y coed ifainc, yn gallu mwynhau crwydro ymysg coed derw, bedw a chyll gosgeiddig nepell o'u cartrefi.

Er y gobeithiwn y bydd Coed Ysgubor Wen yn gaffaeliad i'r dyffryn, rydym yn sylweddoli bod sefydlu coedwig newydd sbon danlli yn dod â newid sylweddol i'r tirlun.

Wedi dweud hyn, dyma'r newid mwyaf diweddar mewn cyfres o newidiadau neu esblygiadau sydd wedi digwydd dros y canrifoedd - llawer ohonyn yn gwbl angof erbyn hyn.

Serch hynny, rydyn yn awyddus i warchod a dathlu unrhyw hen nodweddion ac olion sydd yn llechu yma, yn hytrach na'u gorchuddio a'u gwthio i gilfachau'r cof.

Dyma pam dydyn ni ddim wedi plannu coed ar hyd yr hen lwybrau troed a throl sydd yn croesi'n igam ogam ar draws y llethrau tua'r Ffordd Ddu.

Caiff cenedlaethau y dyfodol werthfawrogi'r goedwig o'r llwybrau hyn yn ogystal a rhai newydd.

Er mwyn i ni allu gwneud gwaith iawn o'n cyfrifoldebau tuag at gyn-drigolion a defnyddwyr Tirgawen a Choed Ysgubor Wen ac i ni allu cyfleu rhywfaint o naws go iawn y lle i ymwelwyr, hoffem wybod mwy gennych.

Rydym eisoes wedi creu darlun ffeithiol drwy edrych ar hen fapiau, dogfenni a thrwy gynnal arolwg o'r adeiladau a saif ar y llecyn ond tybed a oes gennych chi unrhyw hen ffotograffau straeon neu atgofion a all ychwanegu ysbryd a chnawd i'r esgyrn sychion hyn?

Rydym yn arbennig o awyddus i hel deunydd am yr hen lwybrau a'r grŵp adeiladau ym Mhant Llwyfog, sef sied drol ac ysgubordai ŷd, sydd yng nghanol y safle.

Gwyddom bod yr olion presennol fel ag y maent yn dyddio'n ôl i'r 1800au ar y cynharaf, ond a ydych chi'n gwybod:

. Pwy a arferai weithio yma?
. Pa fath o droliau a arferai gael eu cadw yn y sied?
. 0 ble daeth yr ŷd ac i ble y cai ei gludo?
. Sut waith oedd casglu a thrin yr yd?
. A arferai rhyw weithgaredd arall ddig- wydd ym Mhant Llwyfog?
. Beth yw hanes y rhes o goed a blanwyd o flaen yr adeiladau?

Cysylltwch a Eryl Roberts, Coed Cadw, e-bost: [email protected] gydag unrhyw wybodaeth neu luniau os gwelwch yn dda - byddem yn falch o glywed gennych. Croeso i chi hefyd ymuno gyda ni i blannu coed dydd Sadwrn, 20 Mawrth.