Wedi hynny roedd cwpwl ohonom wedi cael blas ar drafeilio a phenderfynwyd edrych am wyliau bythgofiadwy arall.

Yna mis Hydref gweld hysbyseb am wyliau i Efrog Newydd! Wedi holi ymysg nifer o'r criw o ffrindiau pwy oedd am fynd dros hanner tymor Chwefror, dim ond tri ohonom oedd am fentro, sef Sam Jeffs, Ian Davies a minnau, Gwawr Parker.

Dim amser i feddwl; yr wythnos wedyn roedd Sam wedi bwcio'r ticedi i ni hedfan i Efrog Newydd. Roedd yn rhaid i mi ddechrau safio arian nawr, diolch byth fod Dolig yn dod.

Wedi misoedd o ymchwilio a threfnu hostel i aros, amserlen o lefydd roeddem am ymweld â nhw, sut i fynd i Heathrow erbyn 5 y bore', daeth dydd Gwener, 14 Chwefror, amser i ni adael Machynlleth ar y trên i Lundain a Heathrow. Cysgu nos Wener yn "Heathrow Airport" ac yna ar ein ffordd fore dydd Sadwrn, ar yr awyren am 7 awr i Efrog Newydd.

Dydd Sadwrn, Chwefror 15
Cyrraedd am 11 o'r gloch y bore, lle roedd mor oer; yn llawer oerach na Chymru! Roedd yna dacsi melyn yn aros amdanom i fynd â ni i'r Big Apple Hostel, yng nghanol Manhattan. Wrth fynd drwy Efrog Newydd am y tro cyntaf, sylwi fod y lle yn enfawr, roedd y tacsi yn teimlo fel car rali yn gweu i mewn ac allan o'r strydoedd. Wedi cyrraedd yr Hostel, lle bach, uchel, reit ar ochr stryd Broadway a Time Square tua pum drws i lawr roedd Planet Hollywood.

Dydd Sul, Chwefror 16
Dydd Sul, cawsom 'bagels' i frecwast yn y 'Deli' ac wedyn ffwrdd â ni i edrych o gwmpas. Wedi cael ticed i'r 'Metro' am yr wythnos, mi ddefnyddion ni hwn i fynd o gwmpas y ddinas i gyd.

Roedd y siop deganau fwyaf yn y byd rownd y gornel o'r lle roeddem yn aros, 'Toys' R' Us'. Roedd yna 'Dinosaur' a 'Feris Wheel' yng nghanol y siop anhygoel.

Bws Betty
Wedyn, roeddem wedi trefnu i gwrdd â Betty, gwirfoddolwraig o Efrog Newydd ar ran 'Big Apple Greeters' (gwasanaeth am ddim) i'n tywys o gwmpas y ddinas. Roedd gan Betty ffrind o Gymru. Roedd hi wedi ein dewis ni oherwydd ein bod yn dod o Gymru. Aethom i ymweld â siopau enwog 'Blooming Dales', 'Daffy's' a 'Macy's' (siop ddillad fwyaf y byd!) Hefyd siopau fel 'Armani', 'Gucci', a 'Tiffany's' - roedd y stryd yn llawn o siopau dillad drud.

Wedyn cerdded o gwmpas 'Central Park' yn yr eira ac i mewn i'r Plaza Hotel', gwesty smart iawn a drud, lle mae'r sêr' yn aros.

I lawr i'r 'East Village' i edrych am sioe Broadway i'w gwylio, ond doedd dim ticedi ar gael. Diolch i wasanaeth Betty, cawsom weld Efrog Newydd mewn ffordd wahanol, a chanfod llawer am gefndir y ddinas. Erbyn hyn roedd yr eira'n disgyn yn drwm ac yn y bore roedd yna ddwy droedfedd o eira ar y stryd!

Dydd Llun, Chwefror 17 - Efrog Newydd ar stop!
Dydd Llun, penderfynu mynd i'r 'Intrepid Sea-Air-Space Museum'. Roedd yna awyrennau, cychod a llong danfor enfawr ac yn dangos gwasanaethau rhyfel America dros y blynyddoedd. Wedi hynny, mynd am dro o gwmpas Manhattan ac ar y Metro i wahanol lefydd i weld ychydig o Efrog Newydd. Roedd yn bwrw eira drwy'r dydd ac erbyn y prynhawn roedd popeth wedi dod i stop, y ceir ddim yn symud, yr awyrennau na'r trenau, roedd pethau yn edrych yn seriws!

Dydd Mawrth, Chwefror 18 - Profiad emosiynol
Dydd Mawrth oedd y diwrnod mwyaf emosiynol. Er yr holl eira ym mhobman, penderfynom ymweld â Ground Zero lle distaw a hynod o drist. Mi ddaru mi ysgrifennu neges ar fflag Cymru a gosododd Sam y fflag gyda'r gweddill.Roedd y ffens yn llawn o fflagiau a thocynnau gwahanol bobl a gwledydd. Roedd yna bum fflag o Gymru a cwpwl o fflagiau Lleogr. Cerdded o gwmpas y lle i edrych am y tocynnau a'r negeseuon. Roedd awyrgylch dawel iawn yno, ac roedd Sam, Ian a minnau yn teimlo'n drist iawn wrth inni adael.

Yna cerdded lawr Wall Street, roedd yr eira erbyn hyn yn llenwi'r ffyrdd; doedd dim llawer o geir o gwmpas. Roedd Wall Street yn enfawr, ac roedd fflag America enfawr ar adeilad y Stock Exchange. Taith wedyn ar y fferi, heibio pont Brooklyn, Ellis Island, a Liberty Island - Statue of Liberty. Yn anffodus, oherwydd yr eira doedd y fferi ddim yn aros ar yr ynysoedd; piti gan ein bod wedi gobeithio ymweld â Ellis Island.

Dydd Mercher, Chwefror 19 - cyfarfod merch o Dywyn!
Dydd Mercher aethom i ymweld âr U.N (United Nations). Roedd yna nifer o adeiladau ond mi aethom ni i ymweld â'r un fwyaf enwog, lle mae'r U.N. yn cynnal ei chynadleddau. Cawsom fynd i mewn i rai o'r ystafelloedd lle roedd cyfarfodydd yn cael eu cynnal, rhai fyddwch yn eu gweld ar y teledu. Tra roeddem yno roedd cynhadledd ynglyn â rhyfel Iraq newydd orffen.

Y noson hon cawsom gwrdd â Elin Jones, merch Mair Jones, Pennaeth Ysgol Uwchradd Tywyn. Mae Elin yn gweithio yn Efrog Newydd am flwyddyn, ac yn mwynhau'n fawr iawn. Diolch i Elin cawsom fynd allan am bryd o fwyd i Planet Hollywood ac wedyn i weld ffilm yn y sinema. Roedd yn braf cael cwrdd â rhywun o Dywyn!

Dydd Iau, Chwefror 20 - teg edrych tuag adre'
Dydd Iau roedd yn amser pacio am y daith adref. Ond yn gyntaf roedd yn rhaid gwneud ychydig o siopa. Roedd y bechgyn wedi edrych ymlaen yn fawr i hyn! Er bod yr eira yn dal i ddisgyn yn sobor o oer, buom yn siopa am ddiwrnod cyfan! Rhaid oedd cael anrhegion i bawb adref gan gynnwys Kes (ein ci bach ni)!

Ar ôl wythnos yn Efrog Newydd rydym ni i gyd eisiau mynd yn ôl, ond yn yr haf! Os cewch gyfle i fynd, peidiwch ag oedi.

Ar ôl noson yn Llundain, yn nhy modryb i Sam, roeddem yn troi am adref ar y trên unwaith eto. Diolch i Sam a Ian am edrych ar fy ôl i, neu efallai i mi am edrych ar eu holau nhw!

Gwawr Parker