Onid ydy hi mor hawdd edrych ar ein hamgylchiadau ein hunain ac anghofio am amgylchiadau pobl eraill? Eleni eto, bydd y Nadolig i lawer iawn o bobl yn bopeth ond llawen a hynny am nifer o wahanol resymau.

Byddwn yn clywed eraill yn dweud mai rhywbeth i'r Plant ydy'r Nadolig. Mae rhieni yng Nghymru yn gwario arian mawr ar anrhegion Nadolig i'w plant er mwyn sicrhau bod eu Nadolig hwy yn fwy na llawen.

Mae yna blant eraill sydd bron heb wybod beth ydy bod yn llawen. Wrth gyflwyno'r fideo Operation Christmas Child dywedodd yr adroddwr: "Nid oedd ond dagrau a wylo, tristwch ac anobaith i'w weld ar wynebau'r plant. Eu gwelydd wedi eu rhwygo a'u dinistrio gan ryfel a'u teuluoedd wedi eu rhwygo a'u llethu gan dlodi mawr.

Mae'r plant yn gaethweision i'w hamgylchiadau ac oherwydd hynny heb unrhyw obaith o brofi Nadolig Llawen - onibai ein bod ni yn gwneud rhywbeth i'w cynorthwyo."

Un ffordd arbennig o wneud rhywbeth yw ymuno yn ymdrech fawr Operation Christmas Child i roddi bocs esgidiau yn llawn o anrhegion i blant di-freintiedig y byd. Roedd hi'n werth gweld ar y fideo y tristwch a'r galan yn troi i wenu a chwerthin wrth i'r plant agor eu bocsys a chwarae gyda'r anrhegion Nadolig yr oeddynt wedi eu derbyn.

Onid ystyr y Nadolig yw bod yr Iesu wedi gwneud rhywbeth tebyg, er mwyn llawer mwy gogoneddus fel y mae'r apostol Paul yn dweud yn 2 Corinthiaid 8:9? Sylwch ar y ffordd y mae'r Iesu, sy'n gyfoethog yn ei Dduwdod, yn dod yn dlawd yn ei ymgnawdoliad.

Cafodd ei eni mewn tlodi; bu'n byw mewn tlodi a hefyd bu farw mewn tlodi. Dioddefodd y tlodi yna er mwyn i ni sy'n dlawd (heb gredu ynddo) ddod yn gyfoethog (trwy gredu ynddo). Cawn faddeuant am ein holl bechodau ac addewid am fywyd tragwyddol yn ei deyrnas Ef.

Onid ydym ni, felly, yn hynod o falch bod yr Iesu wedi ein helpu ni yn ein tlodi trwy roddi anrhegion arbennig i ni. Wedi'r cyfan, dyna beth ydy anrhegion Nadolig go iawn.

Nadolig Llawen i chwi oll wrth ddathlu dyfodiad Gwaredwr i'r byd.

Y Parch Brian Wright