"Derbyniwyd cais beth amser yn ôl gan fudiadau sy'n cynrychioli ieuenctid yr ardal yn gofyn am barc sglefrio. Cefnogwyd y cais gan sawl llythyr a chan betisiwn o dros 1000 o enwau".Yn ffodus, roedd £32,000 yn weddill o brosiect y cae-pob-tywydd a thasg fwyaf y Bartneriaeth oedd sicrhau gweddill yr arian (bron i £50,000) i wireddu'r freuddwyd. Mae sawl corff wedi cyfrannu'n hael at y gronfa gan gynnwys : Cyngor Gwynedd, Halo Foods, Cyngor Tywyn, y Gymdeithas Hamdden, y Co-op, Hollywood Homes a chlybiau hamdden lleol.

"Mae amryw o bobl wedi gweithio'n hynod o galed i gael y parc hwn", meddai Peter, "a rhaid i mi enwi dau yn arbennig sef George Watson (Prif Swyddog Hamdden Gwynedd) a PC Ifor Williams (Plismon Cymunedol). Mae gennym le mawr i ddiolch i Tina Venables (cyn-Arweinydd leuenctid) am ei chyfraniad hi hefyd".

Cyngor Gwynedd oedd yn gyfrifol am oruchwylio'r prosiect a phan oedd popeth wedi ei gwblhau fe'i trosglwyddwyd i Bartneriaeth Tywyn. Bydd y Bartneriaeth yn trosglwyddo'r cyfrifoldeb o gynnal a chadw'r parc i Gyngor Tywyn maes o law. Caiff y Parc ei agor yn swyddogol ar ddydd Sadwrn, 11 Hydref am 11 o'r gloch.

Mae'r Parc wedi derbyn croeso brwd gan ieuenctid y fro a chan y cyhoedd yn gyffredinol hefyd. Mae'n wir fod ambell un yn amau doethineb gwario'r holl arian ar y Parc ac fe wyddom fod trigolion Cambrian Terrace yn anfodlon ei leoliad. Mae sawl un yn gresynnu hefyd na fyddai'r parc wedi ei leoli wrth lan y môr." Nid dyna farn Peter Saunders, fodd bynnag,

"Pam y dylen ni wthio'r bobol ifanc i lan y môr, mor bell o ganol y dref? Maes chwarae ydy'r Rec ac mae'n hwylus i gynnal gweithgaredd fel hyn."

Llwybr Beicio
Nid y Parc Sglefrio ydy unig lwyddiant Partneriaeth Tywyn. Mae hefyd wedi sefydlu Llwybr Beicio yn yr ardal gyda meinciau pwrpasol yma ac acw ar ochr y ffordd i alluogi beicwyr lluddiedig i orffwys. Mae'r llwybr hwn yn arwain beicwyr o gwmpas Craig yr Aderyn ar hyd ffordd wledig, dawel.

"Y bwriad yn y pen draw ydy sefydlu rhwydwaith o lwybrau tebyg ym Mro Dysynni fel y bo gan y beicwyr ddewis o wahanol deithiau," meddai Peter.

I'r perwyl hwn byddai'n hwb aruthrol i dwristiaeth yr ardal pe llwyddid i godi pont i gerddwyr a beicwyr dros yr afon Dysynni ac hefyd pe llwyddid i agor llwybr beicio rhwng Tywyn ac Aberdyfi. Breuddwyd gwrach? Efallai ........ ond dyna roedd pobl yn ei ddweud am y Parc Sglefrio tan yn ddiweddar.