Cefndir
Gweithwyr o'r Blaid Lafur drefnodd yr eisteddfod gadeiriol gyntaf yn Llanegryn ar ddechrau'r ganrif ddiwethaf. Tan yn ddiweddar, cynhaliwyd yr eisteddfod ym mis Mai, ond gan fod eisteddfod lleol arall yn cael ei chynnal ar yr un diwrnod, bu'n rhaid symud i fis Chwefror yn y 1980au.

Yn y gorffennol, crefftwr lleol fyddai'n llunio'r gadair i'r bardd buddugol. Erbyn hyn bydd cwmni lleol yn darparu cadair esmwyth i'r enillydd, gyda chymorth noddwr.

Ymhlith enillwyr y gadair mae John Ifans, David John a Robin Llwyd ab Owain. Mae'r prifardd lleol John Ifans, cyn brifathro Ysgol Llanegryn, wedi rhoi dau o'r cadeiriau a enillodd mewn eisteddfodau cenedlaethol i'r pentrefwyr, ac maent i'w gweld yn y Neuadd Goffa ac yn ei hen ysgol.

Mae yna hefyd nifer o gwpanau a thlysau, gan cynnwys cwpan coffa Mr a Mrs Robert Gabriel am yr unawd a chwpan y côr er cof am Mr a Mrs Lloyd.

Mae Richard Rees Pennal, Dai Jones Llanilar, Bryn Terfel a John Eifion wedi cystadlu yma dros y blynyddoedd.