Y llynedd bu Ray Picket o Dy Newydd, Rhiwlas, yn codi arian tuag at yr elusen Action Aid a llwyddodd i godi £2,700 ac am wneud hynny llwyddodd i ennill taith gerdded fythgofiadwy, sef Llwybr yr Inca ym Mheriw.

Llwybr yr Inca yw'r daith enwocaf yn Ne America. Mae hon yn daith hynafol iawn sy'n cysylltu Cusco, prifddinas yr Incas â'r hen ddinas goll Machu Picchu. Mae'r lwybr wedi'i adnewyddu i'w hen ogoniant ac mae'n mynd trwy dirwedd fynyddig yr Andes. Dyma Ray yn sôn am ei brofiadau:

"Mae'n braf i mi ddweud i mi lwyddo i gwblhau Llwybr yr Inca heb frifo na salwch. Tra'r oedd yr ymweliad â Machu Picchu yn fendigedig, yr uchafbwynt i mi oedd yr ymweliad â phrosiect a ariannwyd gan Action Aid. Aeth criw ohonom i weld cymuned Anansaya. Roedd y daith yn cymryd dwy awr dros ffyrdd garw a chyntefig. Mae'r gymuned hon wedi derbyn cymorth gan Action Aid. Roedd y prosiect yn canolbwyntio ar ddatblygiad y plant trwy wella maeth, dŵr glan ac addysg.

Roedd hwn yn ymweliad emosiynol iawn a daeth y gymuned gyfan allan i'n croesawu, a theimlem fel y teulu brenhinol. Mae'n anodd rhoi i eiriau yr hyn a deimlem, profiad emosiynol iawn.

Roedd nifer o anerchiadau o groeso gan arweinwyr y pentref. Yn dilyn hyn fe'n diddanwyd â chanu, dawnsio a barddoniaeth a oedd yn adlewyrchu diwylliant yr Andes ac wedyn aethom ar daith o gwmpas y pentref.

Yn gyntaf aethom i'r ysgol ac wedi'n croesawu cawsom sesiwn dda o gwestiynau ac atebion. Gofynnwyd i ni ganu wrthynt ac wrth lwc roedd hen athro yn ein grŵp a chanwyd "Pen, ysgwydd, coes a throes" a braf oedd gweld y plant yn ymuno â ni.

Dysgasom ychydig o Saesneg iddynt a dysgasom ninnau ychydig o Quechan, yr iaith frodorol, ac maent i gyd yn siarad Sbaeneg. Aethom wedyn i weld yr ystafell gyfrifiaduron. Roedd 4 cyfrifiadur yno, wedi'u hariannu gan Action Aid ac roedd y plant i gyd yn edrych yn brofiadol iawn arnynt er nad oeddynt wedi'u cael ond ers mis."

Erthygl gan Ray Picket