 |
 |
|
Holi hwn a'r llall
Tachwedd 2004
Yn ôl Emyr John o Lanfair, sy'n cael ei holi y mis hwn, dydi baswrs y de ddim cystal â rhai'r gogledd ac fe fyddai'n mynd a'i deulu a Beti George allan am ginio pe bai'n cael dewis. |
|
|
|
Enw: Emyr John
Cefndir: Wedi fy ngeni a'm magu yn Llanfair. Dwy flynedd yn y Fyddin ac yna adeiladu tai am hanner can mlynedd. Wedi ymddeol rŵan ond yn gweithio mwy nag erioed (yn ddi-dâl) er mwyn cadw yn ifanc. Does gen i ddim amser i eistedd ar fy mhen ôl yn mynd yn hen.
Hoff le? Harlech a'r cylch. Does unman gwell nag eistedd ar y wal wrth dro Frondeg yn edrych ar yr haul yn machlud. Dyma'r olygfa orau yn y byd.
Hoff liw? Glas.
Hoff fwyd? Omlet nionod, pwdin reis a mins peis Janet Mostert.
Hoff ddarn o gerddoriaeth? Yr ymdeithgan 'The Contestor' yn cael ei chwarae gan Seindorf Black Dyke Mills.
Pa adeg o'r dydd sydd orau gennych?
Bore cyntaf, fel mae hi'n gwawrio. Cael eistedd ar y fainc wrth ymyl y pedwerydd wyrdd a gwrando ar yr adar bach yn canu a gweld ambell gwningen yn chwarae cyn i neb ddod o gwmpas. Cael edrych ar yr olygfa fendigedig - heddwch perffaith.
Pa fath o ganu fyddwch chi'n ei hoffi?
Rhywbeth â gafael ynddo. Corau meibion a chanu cynulleidfaol ac wrth gwrs 'Blaenwern'. Canu o'r Gogledd gan fod bas mor bwysig yn y dôn yma. Nid ydi baswrs y de cystal a rhai'r Gogledd.
Beth ydych chi'n ei gario efo chi?
Fawr ddim - £2.50 a goriada'r car yn un boced a hances yn y llall.
Hoff amser o'r flwyddyn? Y gwanwyn er mwyn gweld dechrau ar yr ardd a gweld tyfiant cyntaf y flwyddyn a'r coed yn blaguro.
Hoff anifail? Ci defaid oherwydd maen nhw mor ddoeth.
Beth wnaech chi efo £5,000? Ei rannu efo rhai sydd fwy o'i angen na fi.
Sut ydych chi'n hoffi treulio eich oriau hamdden? Pob cyfle rydw i'n gael - yn yr ardd. Yn yr amser a fu yn y golff ac wedyn wrth y bar yn sgwrsio a chanu gyda'm ffrindiau. Yn anffodus, mae y rhan fwyaf wedi'n gadael erbyn hyn. Mae'r pethau a'r cwmpeini wedi newid yn arw yn y blynyddoedd diwetha' yma.
Pa atgofion sydd gennych o fod yn yr ysgol?
Ychydig iawn achos yr oeddwn mor awyddus i orffen yno ond yr oeddwn wrth fy modd efo'r gwersi garddio.
Pryd ac ym mhle y buoch chi hapusaf? Pan briodais i a chael llond tŷ o blant. Dyna amser hapusaf fy mywyd; hefyd mwynhau ambell gêm o golff (os oedd y wraig yn caniatáu). Yna mynd i'r band am dros ddeugain mlynedd ac ar ôl ymarfer esgus da oedd cael mynd am ddiferyn i dorri syched.
Pwy ydych chi'n ei edmygu yn yr ardal hon?
Dudley Maidment. Dyma gymwynaswr go iawn, yn helpu pawb, heb ddweud dim wrth neb - does yna ddim llawer o'r rhain ar ôl heddiw.
Pwy yw eich arwr? Aneurin Bevan, mae'n debyg, oherwydd fe wnaeth o gymaint i helpu pawb ym myd iechyd.
Beth sy'n eich blino neu yn eich gwylltio?
Rhai pobl sydd wedi dod yma i fyw ar ôl ymddeol ond eisio neu yn trio dangos i ni y ffordd o fyw.
Tasech chi'n mynd allan i ginio, pwy fase'n cael dod efo chi?
Fy nheulu i gyd a Beti George er mwyn cael sgwrsio efo hi, ac ar ôl gorffen mi fuasa hi'n cael ein dreifio adref yn ei bws.
Beth fyddech chi yn ei gael i fwyta?
Stecsan a'r trimings i gyd - nionod a madarch yn bwysicach na dim, mefus a hufen iâ, a choffi i'w golchi i lawr.
Sut y buasech yn disgrifio chi eich hun ar hyn o bryd?
Wedi cael bywyd hapus, diolch i'r drefn, ac wedi bod yn lwcus iawn o'm hiechyd. Gobeithio yr eith popeth ymlaen am yr ugain mlynedd nesaf - efallai yn hirach!
|
|
|
|
|
|
