Wedi 18 mlynedd yn y swydd yma fe'i penodwyd yn Swyddog Gweinyddol yn 1989. Mae hi wedi gweithio gyda'i thrydydd prifathro, Mr Tudur Williams ers 14 mlynedd.

Cyn ymuno â staff Ysgol Ardudwy bu Mrs Mai Jones adre'n magu'r plant, Hywel a Rhian a chyn hynny treuliodd gyfnod yng Nghaerdydd yn gweithio i'r BBC.

Bydd Ysgol Ardudwy yn lle rhyfedd iawn heb Mai Jones. Rydym wedi hen arfer troi ati mewn cyfyng gyngor a hithau'n dod i'r adwy bob tro. Byddwn i gyd yn ei chofio am ei mynnych gymwynasau, ei charedigrwydd a'i gwasanaeth di-flino i'r ysgol dros y blynyddoedd.

Rydym i gyd yn dymuno ymddeoliad hapus i chi Mai ac y byddwch chi a Mathew yn cael blynyddoedd lawer o fwyniant a phleser.