Yn dy grud mor deg yr wyt,
Yn Eden tawel ydwyt,
Y llechwed sy'n coleddu
Dy hardd wedd rhag adwedd hy.
Pwy heliodd yma'r paled
O liwiog rin 'nôl ei gred
I harddu mor angerddol
Annedd wych uwch hoen y ddol.
Cudd eigion dy ddŵr llonydd
Dan wên haul ar arael rudd.
Geiriau ni wnânt agoryd
Y drws i'th ddirgelion drud.

Ond ynot mae brwd ynni
Cur dibaid i'm henaid i,
Yn ofid dwys o fyd hen
Yn sain groch, yn sŵn crechwen,
Hen ddolen o'r gorffennol,
Tennyn hir i'm tynnu'n ôl,
Yn ôl i gyntefig oes
Niwlennoedd awel einioes.

Ai o'r cawl hwn daw'r cel had
Anad ffrwyth ein deffroad,
Y genyn o wawr geni
Cadwyn hen i'n cydio ni?
Onid slaf i lysnafedd
Yw dyn, er hardded ei wedd?
Daw mewn llif o dwymyn laith
A dymor a hed ymaith,
Hen ddolen o'r gorffennol
Tennyn hir a'i tyn yn ôl.

Er y fraint i'm grwydro'r fro
Fy hunan a'r haf yno,
Daw machlud i'r wlad hudol,
Ac nid af i'w haf yn ôl.
Fy hyder sy'n oferedd
Wedi byw, nid oes ond bedd.

'Hynafgwr'