Ymgartrefodd John Evans Williams a Mary Evans yn Llanwnda yn dilyn eu priodas ym 1905, a chadw'r Post am ddeugain mlynedd.

Bu blynyddoedd yr ail ryfel byd yn rhai prysur tu hwnt yn adeilad y Post, a gorfu i Mary ddod a'i gwely i'r ystafell ffrynt ble'r oedd y Gyfnewidfa Teleffon wedi'i leoli, ac yn brysur, a'r angen i gysylltu galwadau ffôn a'r camp milwrol yn Llandwrog ar bob awr o'r dydd a'r nos.

Yna trosglwyddwyd yr awennau i'w merch, Daisy Lloyd Williams, a'i gŵr William Henry Owen. A'u plant hwythau, Phyllis a John, hefyd yn gweithio'n galed i gynnal y busness.

. Ac yna daeth Phyllis i gymryd cyfrifoldeb dros y Swyddfa Post ym 1978, a dyna pryd y daeth Enid i weithio yn achlysurol gyda'i mam.

Wrth gwrs roedd yna sawl gwasanaeth yn cel eu cynnig o'r adeilad, gan gynnwys siop brysur.

Cofia Enid fel yr arferai y cwsmeriaid adael eu rhestrau ar fore Iau, a hithau wedyn yn dod i helpu ei mam drwy ddanfon y negesau ar ôl dod gartref o'r gwaith y noson honno.

"Dwi'n cofio hefyd ers talwm pan oedd yna negeseuon telegram yn cael eu derbyn fesul lIythyran ganddon ni yn y Post. A mynd bob diwrnod Dolig, yn ddiffael, i Blas Dinas i ddanfon y telegram efo'r dymuniadau da."

Daeth Enid i weithio yn lIawn amser yn y Swyddfa Post ym 1993, ac mae ganddi atgofion melys am y cyfnod o 15 mlynedd a dreuliodd y tu ôl i'r cownter.

"Dwi wedi mwynhau'r gwmnïaeth, a'r sgwrsus difyr efo'r cwsmeriaid ar hyd y blynyddoedd. Ac ma'r cwsmeriaid wedi bod yn ffyddlon iawn i mi. "Mi fydda i'n gweld isho'r ffrindiau da sydd wedi bod yn dod yma dros y blynyddoedd."