Go brin, er hynny, fod neb heb gael ei lygad-dynnu gan y pictiwr o fferm, Talymignedd Isaf, sy'n addurn ar y tirlun ar yr ochr dde i'r ffordd.

Mae'n werth oedi i sylwi'n fanylach ar y fferm fynyddig hon, ar y modd y mae'r holl adeiladau'n gweddu i'w hamgylchedd, ar y defnydd o gerrig a llechi yn y waliau, ar safon y gwrychoedd a'r gatiau derw newydd, dros 40 ohonynt, sydd wedi eu gosod yno.

Gwnaed llawer o'r gwaith adeiladu, yn ogystal â ffensio hyd lannau'r afonydd a chau allan y coedlannau a'r gwlyptir rhag y gwartheg a'r defaid, yn ystod y tair blynedd diwethaf o dan gynllun tir Gofal a chyda nawdd Farming Connect.

Gwobr a drefnir ar y cyd gan Gyngor Gwlad Cymru a Chymdeithas Sioe Amaethyddol Frenhinol Cymru yw hon, ac roedd 19 o ymgeiswyr o bob cwr o Gymru yn cystadlu amdani eleni.

I ddathlu canmlwyddiant y Sioe Amaethyddol y flwyddyn nesaf cyflwynir gwobrwyon arbennig. Bydd y pum enillydd blynyddol er sefydlu'r gystadleuaeth yn cystadlu yn erbyn ei gilydd am deitl 'Pencampwr y Wobr Amaeth-Amgylcheddol'.

Llongyfarchiadau i deulu Talymignedd Isaf ar eu camp eleni, a phob lwc iddynt y flwyddyn nesaf.