Ymgorfforwyd llwybrau llydan o amgylch ynys hirgron wedi eu dyrchafu i lefel cadair olwyn ac wedi ei phlannu â phlanhigion persawrus ac â chyffyrddiad arbennig iddynt. Yn ogystal, cynhwyswyd nodwedd ddwr bas gyda cherrig i roi'r argraff o swn a symudiad i'r ardd.

Yn y gorffennol ni fu modd i'r trigolion gael mynediad i'r tir o amgylch y cartref oherwydd fod yr wyneb yn anwastad a pheryglus a daethpwyd âr anhawster hwn i sylw WHA Healthcare yng Nghaerdydd a gytunodd i gyfrannu rhodd o £2,500 o Gronfa Elusen y Gymdeithas tuag at y gost o ddarparu llecyn addas i'r trigolion i'w fwynhau yn yr awyr agored.

Cytunodd Alan Patterson o Garmel, sy'n ymwelydd rheolaidd â Phlas Gwilym a hefyd yn aelod o Fwrdd Rheoli WHA Healthcare i ddylunio a darparu cynllun ar gyfer yr ardd a chynorthwyodd Lilian Williams a Margaret Roberts, Rheolydd ac Is-reolydd y Cartref, i gydgordio'r prosiect. Yn ogystal, gwahoddodd fusnesau a mudiadau lleol eraill i gyfrannu tuag at y fenter.

Mewn ymateb, cyfrannodd Hanson Brick, Caernarfon gyflenwad o frics ac fe'u cludwyd i Benygroes yn rhad ac am ddim gan Redland Distribution; cyflwynodd y Llewod dair mainc a gafodd eu gwneud yn arbennig mewn gweithdy i'r anabl, Pinewood Products a reolir gan Gyngor Conwy. Cyfrannodd Y Ford Gron swm o £200. Derbyniwyd cyngor ar y plannu gan Ganolfan Arddio Fron Goch a chafwyd cefnogaeth gan Gyngor Gwynedd a ddarparodd y slabiau a'r planhigion, yn ogystal âr nodweddion angenrheidiol i gydymffurfio â'r rheolau iechyd a diogelwch caeth.

Gwahoddwyd perthnasau a ffrindiau'r trigolion i fynychu'r agoriad yn ogystal â chynrychiolwyr o bob mudiad a gefnogodd y fenter a threfnodd y staff wledd o luniaeth ysgafn. Yn dilyn yr agoriad swyddogol a'r cyflwyniad o'r siec gan WHA Healthcare gan y Cadeirydd, Dewi Williams, bu pawb yn mwynhau Dafydd Iwan yn canu rhai o'i ganeuon, ac yn ogystal, darparwyd adloniant gan Fand Dyffryn Nantlle.

Er i'r agoriad swyddogol gael ei ddal yn ôl tan yr Hydref gwnaed defnydd helaeth o'r ardd dros gyfnod o rai wythnosau cyn hynny pryd y bu'r trigolion yn mwynhau gweithgareddau fel bingo awyr agored. Bydd teulu estynedig Plas Gwilym yn siwr o fwynhau llawer mwy o ddyddiau dedwydd tra'n mwynhau'r cyfleuster newydd yma.

Dywedodd Lilian Williams, Rheolwr Plas Gwilym fod yr holl staff, ac wrth gwrs y trigolion yn hynod ddiolchgar i WHA Healthcare am eu haelioni ac i bawb arall sydd wedi cyfrannu i wneud y fenter yma mor llwyddiannus. Gwerthfawrogir cefnogaeth Dafydd Iwan, nid yn unig ar y diwrnod agor swyddogol ond hefyd am bob cymwynas yn y gorffennol.

Yn yr un modd, dymuna'r staff gyfleu gwerthfawrogiad am bob cefnogaeth gan Olwen Elis Jones, is reolwr Uned Breswyl a Dydd Gwasanaethau Cymdeithasol Cyngor Gwynedd.