Ac yn union fel noson Talwrn y Beirdd, mae'r noson hon, gyda chwmnïau lleol yn perfformio, yn llwyddo i ddenu cynulleidfa deilwng iawn.

Arweiniwyd y noson, yn ddeheuig fel arfer, gan Ifan Glyn Jones.

Yn cymryd rhan roedd Cwmni Brynrhos oedd yn cyflwyno 'Parasitiaid' (addasiad Wenna Williams o Parasites gan Margaret Kynaston) gyda Wenna hefyd yn cynhyrchu.

Dyma'r bedwaredd waith i'r cwmni berfformio'r ddrama hon.

Buont eisoes yn cymryd rhan yng Ngŵyl Ddrama Y Groeslon, Amlwch a Chorwen. Byddant hefyd yn cyflwyno'r ddrama yn Theatr Y Maes yn Eisteddfod Y Bala fis Awst.

Wedyn, cawsom berfformiad o'r ddrama Genod Ni gan Gwmni Plant Afradlon Talysarn, cyfieithiad gan aelodau'r cwmni a John Glyn Owen o Doing it for Themselves gan Brian Brown. Rhys Richards oedd yn cynhyrchu'r ddrama hon.

Braf yw gweld y diddordeb lleol yma ym myd y ddrama. Gobeithio'n wir y bydd y ddau gwmni yn dal ati i berfformio, ac yn mynd o nerth i nerth.

A beth am i eraill ymroi ati i ffurfio cwmnïau drama yn yr ardaloedd yma?

Mae'n siŵr fod digon o dalentau heb orfod chwilio ymhell iawn.

Diolch i bawb fu'n cymryd rhan, a diolch hefyd i bawb am eu cefnogaeth.