Hyd at Eisteddfod Genedlaethol Eryri fis Awst, bydd y ddau'n gweithio yn Amgueddfa Lechi Cymru, Llanberis ar gynllun sydd wedi'i ysbrydoli gan effaith y garreg las ar fywyd y fro.

Gan weithio yn y gymuned, bydd yr artistiaid yn ymchwilio i effaith ddiwylliannol, cymdeithasol ac artistig llechi.

Mae'r prosiect yn dipyn o fargen i Dyfrig Peris - dyma gomisiwn sylweddol cyntaf yr artist o Benygroes ers iddo raddio mewn celf ym Mhrifysgol Swydd Gaerloyw ddwy flynedd yn ôl.

"Mae'n gyfle da i wneud job go iawn a rwy'n gobeithio gweld prosiectau eraill yn dod allan ohoni," meddai.

Mae ganddo flys astudio'r traddodiad o gerfio llechi a chwilota am hen offer chwarel. Yn ôl yr artist mae'r posibiliadau'n ddibendraw. Golwg rhywun o'r tu allan sydd gan Maia Conran ar ddiwylliant y llechi.

Wedi graddio mewn celf ym Mhrifysgol Sheffield Hallam y llynedd mae hi wedi symud yn ôl i'w chynefin ym Mangor. Ei bwriad i ddechrau yw ffilmio cyfweliadau - a'r gamp yw canfod pobl o wahanol ardaloedd i'w holi. 'Dwi'n gobeithio gwneud tafluniad fideo ynglŷn â pherthynas pobl a'r chwarel. Mae 'na lot o gymeriadau o gwmpas, ond dydw i ddim isio defnyddio un chwarel yn unig' meddai.

Mae Maia a Dyfrig wedi sefydlu stiwdio yn yr Amgueddfa Lechi yn Llanberis, ac yn ogystal â dangos y gwaith celf gorffenedig, bydd yr artistiaid yn trefnu cyfres o ddigwyddiadau yn yr Eisteddfod Genedlaethol.

Trefnir cynllun llechi gan Cyswllt Cymru mewn partneriaeth ag Amgueddfeydd ac Orielau Cenedlaethol Cymru ac Eisteddfod Genedlaethol Cymru.