Y bwriad oedd ei ailgodi wrth ymyl Llainfadyn, bwthyn a adeiladwyd yn Rhostryfan yn wreiddiol yn 1762, ond sydd bellach yn un o atyniadau mwyaf poblogaidd yr Amgueddfa. Erbyn hyn mae'r beudy wedi ei gludo fesul carreg i dde Cymru a'r gwaith ar y bwthyn yn mynd rhagddo. Nid yw'r to yn orffenedig ond gyda'r gwaith cerrig wedi ei orffen bydd yr adeilad yn gyflawn cyn hir ac yn gartref unwaith eto i fuwch a llo. Ac yn ystod mis Hydref bu gweithwyr Antur Waunfawr yn ymweld â'r amgueddfa yn Sain Ffagan i weld beudy Cae Gadda.

Croesawyd y grwp gan Gyfeillion yr Amgueddfa a'r gweithwyr oedd wedi bod yn dymchwel y beudy beth amser yn ôl. Darparwyd lluniaeth ac roedd cyfle i ymlwybro drwyr safle i edrych ar yr adeiladau a chreiriaur gorffennol yn ogystal â sylwi ar adeilad diddorol arall sef Ty y Dyfodol. Roedd hwn o ddiddordeb arbennig i'r gweithwyr yn enwedig o gofio y bydd adeilad gwyrdd cynaladwy newydd yn cael ei adeiladu ar safle newydd Antur Waunfawr yng Nghaernarfon yn y dyfodol.

Wedi treulio noson yn aros yng Nghanolfan Chwaraeon Cymru ym Mharc Soffia, bu gwahanol grwpiau yn ymweld â'r Amgueddfa Genedlaethol, Stadiwm y Mileniwm, Bae Caerdydd, y Castell, trip ar fws to agored o gwmpas y ddinas, ac yn y canolfannau siopa amrywiol. Wedi diwrnod llawn, cychwynnodd y bws yn ôl am Waunfawr gyda'r teithwyr yn eithaf swrth a wrth eu bodd.

Trefnwyd yr ymweliad - a oedd yn rhan o ddau ddiwrnod o hyfforddiant yn y brifddinas - ar y cyd rhwng Ken Brassil, Swyddog Addysg Amgueddfa Genedlaethol Cymru; Sioned Hughes, Amgueddfa Werin Sain Ffagan a Dafydd Arfon Jones, Swyddog Addysg Antur Waunfawr.

Mae wedi bod yn fis prysur i'w Antur - gan eu bod hefyd wedi cael gwahoddiad i fynd i 10 Downing Street, ar gyfer derbyniad gyda Tony Blair ar ddatblygiad cynaladwy.