Wrth groesawu pawb yno dywedodd Jenkin Griffiths, Cadeirydd y Gymdeithas, fod Llanberis wedi ei ddewis fel lleoliad gan fod Gwilym yn hannu oddi yno. Yn wir roedd Gwilym eisoes wedi cael sylw gan y Prifardd R. Bryn Williams yn ei gerdd i Wauncwmbrwynog fel a ganlyn:
Daeth deugain addolwr i'r capel llwm
Rhai o'r gwastadedd a rhai o'r cwm;
Ac wrth dy fedyddio, Faban gwyn,
Cofiais am wynfyd y llethrau hyn.

Yn ôl a ddeallaf,' meddai Gwilym oedd y baban y cyfeirir ato yn y gerdd. Felly roedd Gwilym eisoes wedi cael sylw yn hanes yr ardal o'i ddyddiau cynnar, ond heddiw dyma reswm arall i'r ardal gofio amdano fel un a roddodd un mlynedd ar hugain o wasanaeth clodwiw drwy ei arweiniad i Gymdeithas y Deillion Gogledd Cymru.'

Yn ystod y cyfarfod daeth cyfraniad Gwilym yn glir wrth i'r amrywiol siaradwyr ddwyn i gof y datblygiadau yn ystod y cyfnod. Talwyd teyrngedau iddo gan lu o bobl, yn eu plith Arthur Rowlands ar ran y deillion, Tom Hughes ar ran y Pwyllgor Cyllid, Paul Brenneck ar ran RNIB, Glyn Tomos ar ran y Cynghorau, Mrs Jennie Rowland Jones ar ran Clybiau'r Deillion (mae 12 ohonynt dros Ogledd Cymru), Manon Williams, un o'r Swyddogion Adfer ar ran y staff, a chynigiwyd llwnc destun iddo gan Faer Bangor.

Pan gychwynnodd Gwilym yn ei swydd roedd y Gymdeithas wedi dathlu ei chan mlwyddiant ac yn edrych ymlaen at ddatblygu ac ehangu canolfan wybodaeth ym Mangor, a chael stiwdio recordio yno hefyd. Heddiw mae hyn wedi ei wireddu yn ogystal a chael Canolfan Casetiau Llyfrau Cymraeg yng Nghaerfyrddin.

Bryd hynny roedd Llys Onnen, sef cartref i'r deillion yn Abergele, gyda un Swyddog Adfer wedi ei lleoli yno. Heddiw mae Llys Onnen yn parhau ac mae'r Gwasanaeth Adfer, mewn cydweithrediad â'r Cynghorau Sir, hefo 5 o swyddogion yn gwasanaethu Môn, Gwynedd a Chonwy.

Y mae'r Ganolfan Adnoddau ym Mangor erbyn hyn yn cynnwys arddangosiad o offer a chymhorthion soffistigedig i'r gegin, y cartref a'r swyddfa, ac fe roddir hyfforddiant erbyn hyn i'r deillion cofrestredig i fanteisio ar gyfrifiaduron modern hefo meddalwedd sy'n siarad. Hyn oll i geisio adfer rhywfaint o'r hyder a'r annibyniaeth a gollwyd.

A ran pawb oedd yn bresennol a chyfeillion eraill oedd wedi cyfrannu at y dysteb, cyflwynwyd iddo deledu lliw llydan; peiriant fideo; peiriant DVD; copi o newyddiadur a gyhoeddwyd ar y diwrnod y cychwynnodd ar ei waith gyda'r Gymdeithas ynghyd â newyddiadur ar ddiwrnod ei ymddeoliad; ffeil o sylwadau a chardiau dymuniadau da nifer o ffrindiau; llun wedi ei fframio o'r Wyddfa o Ben Llyn a'r llyfr Cymru o Hud. Dymunwyd iddo ymddeoliad hir a hapus.