Er mai nifer cymharol fechan o bobl a ddaeth i'r cyfarfod i gynnig eu cymorth ddechrau Gorffennaf, penderfynwyd y byddai'r Eco yn parhau am y tro.

Newyddion da yn wir - ond rhaid pwysleisio bod angen mwy o wirfoddolwyr a chymorth o hyd. Ar hyn o bryd, gosodir yr Eco trwy ddull hynod gyntefig, gyda siswrn a glud! Er mwyn symud gyda'r oes y nod yw derbyn meddalwedd cysodi papurau newydd arbenigol er mwyn hwyluso'r gwaith.

Bydd dau dîm golygyddol yn gysylltiedig a'r Eco - yn gosod a golygu bob yn ail a dylid gyrru unrhyw newyddion sydd i'w cynnwys yn rhifyn nesa'r Eco at y gohebwyr bro: Gavin Saynor, Penarth, Stryd yr Orsaf, Llanrug (gyferbyn â Stad Tal-y-bont), neu drwy e-bostio: [email protected]

Ni fydd modd gadael newyddion yr Eco yn Palas Print o hyn ymlaen.

Rhaid pwysleisio bod yr angen am fwy o gyfranwyr a gwirfoddolwyr yn dal i fodoli. Rydym yn ymbil arnoch, bobl ifanc yr ardal, i roi cymorth i ni er mwyn gwneud yr Eco yn bapur i'r holl fro.

Yr ydym yn awyddus iawn hefyd i dderbyn cymorth wrth hel straeon lleol ac i annog unrhyw un sydd â stori dda, neu syniad am golofnau newydd i'w gynnwys yn yr Eco. Mae croeso mawr i chi gysylltu â'r tîm golygyddol.