Dilynwch un i'r Awyrlu ac i Ynys Enlli yn ystod cyfnod clwy traed a'r genau. Ewch gyda'r llall i gae pêl-droed Bolton Wanderers a llwyfan y Genedlaethol. Crwydrwch Gymru benbaladr gydag un i fwynhau nosweithiau llawen, ac i fynychu eisteddfodau gyda'r llall. Ond daw'r ddau a chwi'n ôl yn ddiogel wedi dwy daith fythgofiadwy i'w gwreiddiau yn y fro hon.

Ym Methel y lansiwyd llyfr Selwyn Griffith o Barc-y-wern i Barc y Faenol, ac y mae yntau'n dilyn y daith o fro ei febyd i lawr y lôn i faes yr Eisteddfod Genedlaethol yn y Faenol. Ond fel Rol Williams, mae yntau hefyd yn crwydro cryn dipyn oddi ar y ffordd uniongyrchol ac yn ymweld â phob ardal yng Nghymru i feirniadu mewn eisteddfodau, heb sôn am y gwledydd eraill y bu'n treulio gwyliau ynddynt.

Lansiwyd llyfr Rol Williams, Nid Roc... ond Rol, yn y Caban ym Mrynrefail. Dyma fro ei febyd, a dilynwch ei daith yr holl ffordd i'r Waunfawr. Mae cryn dipyn o oedi ar y ffordd, wrth gwrs, a chrwydro oddi ar y ffordd uniongyrchol!

Dyma ddau lyfr a ddylai fod yn hosan Nadolig pob un o ddarllenwyr yr Eco; heb anghofio Gwynfyd Gwaun Gynfi a gyhoeddwyd yn gynharach y gaeaf hwn.