Hanes tylwythen deg unigryw sy'n dod yn fyw ar noson stormus yn y Sefydliad Coffa, Llanrug yw 'Digon Teg!'. Gyda chymorth y dylwythen, mae aelodau Rygarug yn mynd ar daith anhygoel i ddarganfod y sioe berffaith.

Treuliwyd yr wythnos hanner tymor yn Theatr Seilo yn ymarfer a pharatoi ar gyfer y sioe. Diolch yn fawr ir holl aelodau am eu amynedd a'u parodrwydd i deithio'n ddyddiol ar y bws o Lanrug i Gaernarfon. Roedd yn waith caled ac ar brydiau yn ddiflas ond roedd yn braf clywed y plant yn arfer termau theatrig a thermau technegol yn hollol naturiol erbyn diwedd yr wythnos!

Daeth nifer o wynebau adnabyddus i gymryd rhan yn y sioe. Cododd John Eifion ofn ar bawb fel y 'Dyn Drwg yn y Caws', roedd y gynulleidfa wrth eu boddau gyda Emyr Gibson fel y Brenin Ri a daeth Elfed Morris, Y Self Made Man ag ychydig o razzamatazz i'r llwyfan. Roedd yn braf gweld plant, pobol ifanc ac oedolion o bob rhan o Ddyffryn Peris yn cyd-weithio fel un tîm.

Wel, mae'r sioe drosodd ond nid dyna'r stori i Rygarug o bell ffordd. Mae nifer o weithdai ar y gweill dros y misoedd nesaf - Syrcas, Band Samba a Dawns a lot o hwyl ar ôl yr holl waith caled. Yn yr haf byddwn yn ymweld â set y gyfres deledu Rownd a Rownd ym Mhorthaethwy.

Torri record trwy ddawnsio Macarena !
Ar Fehefin 14eg yn Llanberis byddwn yn ceisio gosod record ar gyfer y Guinness Book o Record Breakers drwy gael y nifer fwyaf i ddawnsio Macarena, Dawns Rygarug ac eraill. Fe fydd gwestai arbennig o'r cyfryngau ar byd chwaraeon yn dod yno i'n cynorthwyo. Mwy o fanylion i ddod!

Os hoffech ymuno yn yr hwyl cysylltwch â Rygarug yn 12, Stryd Twll yn y Wal, Caernarfon, Gwynedd LL5. 1RF neu ffoniwch (01286) 675766.