ندیم سعید بی بی سی اردو ڈاٹ کام، میانوالی

	پولیس کا کہنا ہے کہ رشتے لڑکیوں کی مرضی سے ہوئے لیکن لڑکیاں انکار کرتی ہیں

ونی کی روایت کو حال ہی میں غیر قانونی قرار دے دیا گیا ہے اور اس جرم کی کم سے کم سزا تین سال جبکہ زیادہ سے زیادہ دس سال قید با مشقت مقرر کی گئی ہے۔

گرفتار ہونے والوں میں ونی کی جانے والی لڑکیوں کے باپ، ان کے متوقع دولہے اور ان کے والد اور پنچایت کے دو کرتا دھرتا افراد شامل ہیں۔

مرمنڈی میں ایک پنچایت نے انیس سو نوے میں قتل کے ایک تنازعے میں صلح کی خاطر ملزم فریق کو پابند کیا تھا کہ وہ مقتول کے خاندان میں اپنی پانچ بیٹیاں ونی کرے گا۔

ونی قرار دی جانے والی پانچ میں سے دو لڑکیاں اس وقت بالغ جبکہ تین نا بالغ تھیں۔ بالغ لڑکیوں کو فوری طور پر ونی کر دیا گیا جبکہ نابالغ لڑکیوں کے ’شرعی نکاح‘ پڑھا دیئےگئے۔ بالغ ہونے پر لڑکیوں نے ونی ہونے سے انکار کیا اور انسانی حقوق کے لیئے کام کرنے والے کچھ سماجی کارکنوں نے یہ بات حکومت تک پہنچا دی۔

پولیس حکام نے اس اطلاع پر موسیٰ خیل پولیس سرکل کے انچارج ڈی ایس پی ملک اقبال اعوان کو لڑکیوں کی مرضی جاننے کے لیئے مرمنڈی بھیجا۔ ڈی ایس پی نے اپنی رپورٹ میں لکھا کہ لڑکیاں ان رشتوں پر خوش ہیں اس لیئے کوئی تادیبی کاروائی نہیں ہوسکتی۔

لیکن ونی قرار دی جانے والی ایک لڑکی تسلیم بی بی نے بی بی سی کو بتایا کہ اس سے بیان لینے کوئی پولیس والا نہیں آیا۔ تسلیم کا کہنا تھا کہ وہ ونی ہونے کی بجائے مرنے کو ترجیح دے گی۔ تسلیم کے والد محمد زمان خان نے بتایا کہ پولیس والے لڑکیوں سے منسوب ایک تحریر شدہ بیان لائے تھے کہ ’رشتے ہماری مرضی سے طے کیئے گئے ہیں‘۔لیکن لڑکیوں نے اس بیان کی تصدیق کرنے سے انکار کردیا جس پر پولیس والوں نے مبینہ طور پر ایک لڑکے سے بیانات پر انگوٹھے لگوا کر کہہ دیا کہ لڑکیوں نے رشتوں کے حق میں بیان دیا ہے۔محمد زمان اور ان کے بھائیوں سلطان خان اور خضر حیات کا کہنا تھا کہ انہوں نے اپنی بیٹیوں کو پنچایت کے دباؤ پر ونی کیا تھا لیکن اگر حکومت یہ ’رشتے‘ ختم کرا دے تو انہیں خوشی ہوگی۔ ان کا کہنا تھا کہ بصورت دیگر انہیں رواج کے مطابق بیٹیوں کو ونی کرنا پڑے گا۔

بدھ کے روز میانوالی کے ضلعی پولیس افسر زراعت کیانی سے رابطہ کیا گیا تو انہوں نے مرمنڈی کے کیس کے بارے ڈی ایس پی اقبال اعوان کی طرف سے کی گئی رپورٹ کا حوالہ دیتے ہوئے کہا کہ ’لڑکیاں خوش ہیں‘ اور وہیں شادی کرنا چاہتی ہیں جہاں ان کے ماں باپ نے طے کی ہیں۔

انہیں جب تسلیم بی بی کے بیان کا حوالہ دیا گیا تو انہوں نے ماننے سے انکار کرتے ہوئے کہا کہ ان کے ماتحت غلط رپورٹ دے ہی نہیں سکتے۔ انہوں تسلیم، فوزیہ اور عصمت کے بیانات اور ’انگوٹھوں کے نشان‘ بھی دکھائے جو بظاہر ایک ہی ہاتھ سے لکھے ہوئے تھے۔ تاہم جمعرات کے روز اسی معاملے میں اچانک نو افراد کے خلاف تعزیرات پاکستان کی دفعات تین سو دس (اے) اور ایک سو نو کے تحت مقدمہ درج کر کے انہیں گرفتار کر لیا گیا۔

لڑکیوں کے والدین کا کہنا تھا کہ پولیس پنچایت کے بااثر ارکان کی پشت پناہی کرتی ہے اور غریبوں کو دباتی ہے۔ میانوالی پولیس نے لڑکیوں کو ونی کرنے پر مقدمہ درج کرکے ان میں سے ہر ایک کے والد سمیت نو افراد کوگرفتار کر لیا ہے لیکن غلط رپورٹ دینے والے پولیس اہلکاروں کے خلاف ابھی تک کوئی کاروائی نہیں کی گئی۔

میانوالی میں ونی پر پابندی کے قانون کے تحت درج ہونے والا یہ دوسرا مقدمہ ہے۔ اس سے پہلے چند روز قبل واں بھچراں کے علاقے میں اسی قانون کے تحت بارہ افراد کو گرفتار کیا گیا تھا۔