’گذشتہ دہائیوں کی بدترین کشیدگی کا سامنا کر رہے ہیں‘: بی بی سی کو اسلام آباد کے رہائشیوں نے کیا بتایا؟, آزاده مشیری
بی بی سی ورلڈ کی ٹیم نے پاکستان کے دارالحکومت اسلام آباد میں ایک مارکیٹ کا دورہ کیا، جہاں لوگ خوف کا شکار تو نظر نہیں آئے لیکن بہت سے لوگوں نے کہا کہ وہ گذشتہ دہائیوں کی بدترین کشیدگی کا سامنا کر رہے ہیں۔
پاکستان اور انڈیا ایک دوسرے پر کشیدگی بڑھانے کا الزام عائد کر رہے ہیں لیکن ایک دکاندار نے بی بی سی کو بتایا کہ پاکستانی فوج کے پاس جوابی کارروائی کے علاوہ کوئی آپشن نہیں تھا تاہم ان کا ماننا ہے کہ کشیدگی کم نہیں ہو گی۔
انھوں نے کہا کہ ’مجھے اپنی حفاظت کی فکر نہیں لیکن مجھے نہیں معلوم کہ یہ سب کیسے ختم ہو گا۔ دونوں ملکوں کے لیے جنگ بری ہے۔‘
ایک اور شخص نے بتایا کہ وہ برطانیہ واپس جانا چاہتے ہیں لیکن فضائی حدود بند ہے۔ انھوں نے کہا کہ ’ہم ان حالات میں بھی اپنی چھٹیاں انجوائے کرنے کی کوشش کر رہے ہیں۔
تاہم انھوں نے اس امید کا اظہار کیا کہ پاکستان اور انڈیا کے درمیان امن ہو جائے گا۔
