د پاکستان بهرنیو چارو وزارت او په افغانستان کې د طالبانو حکومت منلې چې په دوه ورځني یا ۴۸ ساعته اوربند باندې یې هوکړه کړې. که څه هم پاکستان وايي چې اوربند "د طالبانو حکومت په غوښتنه" رامنځته شوی خو د طالبانو حکومت ویاند ذبیح الله مجاهد بیا ویلي چې، "د پاکستاني اړخ په غوښتنه او اصرار به نن ماښام له پنځه نیمو بجو وروسته د دواړو هېوادونو ترمنځ اوربند پلی شي."
"پر کابل ښار دوه بریدونه شوي"
په کابل کې حکومتي سرچینو بيبيسي ته منلې چې په تایمني سیمه کې "د پاکستان هوايي ځواکونو دوه بریدونه کړي دي چې لږ تر لږه شپږ ولسي کسان پکې وژل شوي او تر ۱۶ ډېر ژوبل دي." بيبيسي ته ځينې ویډيوګانې رسېدلي چې د ماشومانو په ګډون ګڼ کسان پکې تر بریدونو وروسته پر ځمکه په ژوبل حالت کې پراته برېښي.
ایمرجنسي روغتون ته هم مړي او ټپیان وروړل شوي
په کابل کې ایمرجنسي روغتون هم نن چهارشنبه (اکتوبر ۱۴ / تله ۲۲) په یوه خبرپاڼه کې ویلي چې د برید له ځایه "د ښځو او ماشومانو په ګډون ۴۰ ټپیان وروړل شوي چې له ډلې یې پنځه روغتون ته پر لار مړه شوي وو." ایمرجنسي روغتون همدا راز ویلي چې د لسو نورو ژوبلېدلو روغتیايي حالت نازک دی.
د چهارشنبې (اکتوبر ۱۴ / تله ۲۲) په ګهیځ وختي د کندهار په سپين بولدک کې د طالبانو حکومت ځواکونو او د پاکستان پولهساتو تر منځ نښته وشوه. وروسته د پاکستان دولتي تلویزون (پيټيوي) د دغه هېواد د امنیتي سرچینو له خولې ادعا وکړه چې پاکستان پر پلازمېنه کابل او کندهار هوايي بریدونه کړي دي. په کابل کې د چاودنو غږونه اورېدل شوي وو خو د طالبانو حکومت د بریدونو په اړه څه ونه ویل.
وروسته له کابله د اورلګېدنې او چاودنې رپوټونه ورکړل شول. ذبیح الله مجاهد پرخپله اېکسپاڼه د کابل ښار یوه ویډيو خپره کړه چې له یوې سیمې لوګي پورته کېږي او ورسره لیکلي یې وو چې، "د کابل ښار په مربوطاتو کې د تېلو یو ټانکر چاودلی چې له امله یې یوه اورلګېدنه رامنځته شوې، څوک دې تشویش نه کوي."
د یوه افغان خبریال وژل کېدل
د طالبانو تر واک لاندې ملي راډيو تلویزون پر اېکس ولیکل چې د خوست ولایت په ځاځي میدان ولسوالۍ کې ډيورنډ کرښې ته څېرمه د پکتیا ملي راډیو تلویزون خبریال عبدالغفور عابد وژل شوی او ورسره دوه همکاران یې ژوبل شوي دي. سرچینو ویلي چې دوی د نښتو په اړه خبرونه جوړول چې د پاکستان ډرون له لوري پرې په "قصدي ډول" برید وشو.
تازه ترینګلتیا څنګه پیل شوه؟
د افغانستان او پاکستان ترمنځ دا تازه ترینګلتیا تېره پنجشنبه (اکتوبر ۹/تله ۱۶) وروسته له هغه رامنځته شوه چې په افغانستان کې د طالبانو حکومت وویل چې پاکستان د دغه هېواد "هوايي حریم نقض" کړی او وروسته یې ډيورنډ کرښې ته څېرمه له پاکستانیو پولهساتو سره نښته وکړه. هغه نښته د طالبانو حکومت "غچ اخیستنه" وبلله خو پاکستان "بې دلیله یرغل" یاد کړ.
