آپ اس وقت اس ویب سائٹ کا ٹیکسٹ پر مبنی ورژن دیکھ رہے ہیں جو کم ڈیٹا استعمال کرتا ہے۔ مرکزی ویب سائٹ جہاں تمام تصاویر اور ویڈیوز موجود ہیں دیکھیے
پاکستان میں جمعرات کو 100 سے زیادہ نئے مریض سامنے آنے بعد ملک میں کورونا سے متاثر ہونے والے افراد کی تعداد 2426 ہوگئی ہے جبکہ 35 افراد اس وبا سے ہلاک ہوئے ہیں۔ وزیراعظم عمران خان نے کہا ہے کہ پاکستان میں جس شرح سے کورونا پھیل رہا ہے اس سے نمٹنے کے وسائل موجود ہیں۔
کورونا وائرس بہت تیزی سے دنیا کے مختلف ممالک میں پھیل رہا ہے اور اب تک اس کا مصدقہ علاج دریافت نہیں ہو سکا ہے۔ تاہم بدقسمتی سے کورونا وائرس کے علاج کے حوالے سے آن لائن طبی مشورے دیے جانے کا سلسلہ جاری ہے۔ بعض مشورے بیکار مگر بے ضرر سے ہیں مگر بعض انتہائی خطرناک۔
مکمل خبر پڑھیے: کورونا وائرس: ان چھ جعلی طبی مشوروں سے بچ کر رہیں
بلوچستان حکومت نے آج (منگل) دن 12 بجے سے سات اپریل تک صوبہ بھر میں مکمل لاک ڈاؤن کا اعلان کر دیا ہے۔ محکمہ داخلہ و قبائلی امور بلوچستان کے نوٹیفکیشن کے مطابق بلوچستان بھر میں شہریوں کی ہر قسم کی غیر ضروری نقل و حرکت پر پابندی عائد ہوگی اور صرف اشیائے ضروریہ کا سامان فروخت کرنے والی دکانیں اور میڈیکل سٹورز کھلے ہوں گے۔
نوٹیفکیشن کے اہم نکات
صوبہ پنجاب میں کورونا وائرس کے مزید پھیلاؤ کو روکنے کی غرض سے لیے گئے خصوصی حکومتی اقدامات کے تحت راولپنڈی اور اسلام آباد میں میٹرو سروس بند کر دی گئی ہے۔
نمائندہ بی بی سی فرحت جاوید کے مطابق میڑو سروس کو چیف سیکریٹری پنجاب اور کمشنر راولپنڈی کے احکامات پر پیر اور منگل کی درمیانی شب بند کیا گیا ہے۔
سندھ میں لاک ڈاؤن کی خلاف ورزی کے الزام میں گذشتہ 24 گھنٹوں کے دوران سندھ پولیس نے 748 افراد کو گرفتار کیا ہے۔
246 افراد کو کراچی کے مختلف علاقوں جبکہ 374 کو لاڑکانہ سے گرفتار کیا ہے۔
یاد رہے کہ سندھ حکومت کی جانب سے اس حوالے سے جاری کردہ نوٹیفیکیشن میں کہا گیا ہے کہ حکومتی ہدایات کی خلاف ورزی پر قانون نافذ کرنے والے ادارے قانون توڑنے والوں کے خلاف سخت ایکشن لیں گے۔
حکومتِ پنجاب کی جانب سے 23 فروری کو جاری کردہ ایک نوٹیفیکیشن کے مطابق صوبہ بھر میں آج سے لاک ڈاؤن کا نفاذ کیا جا رہا ہے۔ یہ لاک ڈاؤن منگل (آج) صبح 9 بجے سے لے کر سات اپریل کی صبح 9 بجے تک جاری رہے گا۔
لاک ڈاؤن کے تحت کیا بند ہو گا؟
گھر سے باہر نکلنے کی مشروط اجازت کن حالات میں؟
کیا کھلا ہو گا؟
پابندی سے مستثنی کون ہو گا؟
سٹیٹ بینک آف پاکستان نے بینکوں کو ہدایت جاری کی ہے کہ لوگوں کو ایسے کرنسی نوٹ میسر کریں جو استعمال کے لیے مناسب اور جراثیم سے پاک ہوں۔
’سٹیٹ بینک آف پاکستان اسے یقینی بنائے گا کہ ہسپتالوں اور کلینکس سے آنے والے کرنسی نوٹوں کو جراثیم سے پاک کیا جائے اور قرنطینہ میں رکھا جائے۔‘
حکومتِ پنجاب کی جانب سے جاری کردہ نوٹیفیکیشن کے مطابق:
تاہم اس کا اطلاق بیماری کی روک تھام کے لیے متحرک اداروں پر نہیں ہوگا۔ لوگ اپنی رہائش گاہوں کے قریب سامان خرید سکتے ہیں۔ ایسے مذہبی اجتماعات ہوسکیں گے جنھیں روکا نہیں جاسکتا، جیسے نماز جنازہ۔ ایسے بینک، دفاتر اور کاروبار کھلے رہیں گے جہاں ضروری کام جاری ہے۔
ریستوران کی ہوم ڈیلوری اور ریکسیو سروسز جاری رہیں گی۔
یہ اقدامات 24 مارچ کی صبح سے 7 اپریل تک نافذ رہیں گے۔
پاکستان کے دارالحکومت اسلام آباد میں پولیس نے بعض علاقوں میں حکومتی ہدایات کی خلاف ورزی کرنے والے افراد کے خلاف کارروائی کی ہے۔
پولیس نے آئی 8، آئی 9 اور آئی 10 میں کارروائی کرتے ہوئے غیر ضروری دکانیں، کیفے اور دوسری سروسز بند کرا دیں، سوائے گروسری سٹورز اور دوا خانوں کے۔
حکام کے مطابق پولیس نے یہ اقدام کورونا وائرس سے لوگوں کی حفاظت کے لیے اٹھایا ہے۔
پاکستان میں کورونا وائرس سے سب سے زیادہ متاثر صوبہ سندھ کی حکومت کی مدد کے لیے ایک 88 سال ریٹائرڈ شخص نے 10 لاکھ روپے عطیہ کیے ہیں۔
ترجمان وزیراعلیٰ سندھ کے مطابق اس شخص نے وزیراعلیٰ سندھ کو 10 لاکھ روپے کا چیک دیا جس کے ساتھ ایک خط تھا۔
ترجمان نے بتایا کہ عطیہ دینے والے شخص نے اپنا نام خفیہ رکھنے کی درخواست کی ہے اور یہ پیسے کورونا وائرس کے خلاف جنگ میں خرچ کرنے کا کہا ہے۔
انھوں نے مزید کہا کہ کورونا وائرس سے بچاؤ کے ’فنڈ میں لوگ دل کھول کر عطیہ دے رہے ہیں۔‘
کراچی سمیت صوبہ سندھ میں مجموعی طور پر حکومتی ہدایات کی خلاف ورزی پر 72 مقدمات درج کر لیے گئے ہیں۔
ان میں کراچی میں 33، میرپورخاص میں 2 اور لاڑکانہ میں 36 مقدمات درج کیے گئے ہیں۔
سندھ میں 472 افراد کو خلاف ورزی پر گرفتار کیا گیا۔
پاکستانی فوج کے شعبہ تعلقات عامہ (آئی ایس پی آر) کے ڈائریکٹر جنرل میجر جنرل بابر افتخار نے پریس بریفنگ میں بتایا ہے کہ حالات سے نمٹنے کے لیے فوج کو آرٹیکل 245 کے تحت ملک بھر میں طلب کر لیا گیا ہے۔
ان کا کہنا تھا کہ فوج اقدامات کر رہی ہے اور تمام وسائل کا استعمال کیا جائے گا۔ کور کمانڈرز کانفرنس میں سول اداروں کی مدد کے لیے کی جانے والی تیاریوں کا جائزہ لیا گیا۔
انھوں نے بتایا ہے کہ فوج کے طبی عملے کو بھی طلب کیا گیا ہے۔ حکومتی اقدامات کے مطابق نقل و حرکت پر پابندی رہے گی، میڈیکل سٹور کھلے رہیں گے اور صرف کھانے پینے کی سپلائی کے لیے سڑکیں کھلی ہوں گی۔ ان کا کہنا تھا کہ مغربی سرحد اور لائن آف کنٹرول پر بھاری تعیناتی کے باجود فوج نے ضرورت کے تحت اپنے وسائل کورونا وائرس کے بچاؤ کے لیے بھیجنے کے احکامات جاری کر دیے ہیں۔
ان کا کہنا تھا کہ: ’آئسولیشن سے زیادہ ضروری تعاون ہے۔۔۔ اس بار خطرہ بہت مختلف ہے۔۔۔ فوج عوام کے ساتھ کھڑی ہے۔‘
میجر جنرل بابر افتخار نے کہا کہ یہ وقت مشکل اور سخت فیصلے کرنے کا ہے۔ ’سکریننگ اور حفاظتی تدابیر اہم ہیں۔۔۔ اب تک 10 لاکھ لوگوں کی سکریننگ کی گئی ہے۔‘
انھوں نے بتایا کہ ملک بھر میں قرنطینہ مراکز میں حفاظتی اقدامات کو یقینی بنایا جائے گا۔ آرمی چیف نے ایک ماہ کی تنخواہ عطیہ کرنے کا اعلان کیا ہے۔
انھوں نے گزارش کی کہ تمام لوگ ذمہ دار شہری بن کر ہدایات پر عمل کریں۔ ’اس جنگ میں پاکستانی فوج، ایجنسیوں اور اداروں کے ساتھ تعاون کریں۔‘
پاکستان کے صوبہ سندھ میں پیر کو کورونا کے 42 نئے مریض سامنے آنے کے بعد جہاں صوبے میں متاثرہ افراد کی تعداد 394 تک پہنچ گئی ہے وہیں پاکستان میں کورونا کے متاثرین کی مجموعی تعداد 884 ہو گئی ہے۔
صوبہ سندھ بدستور ملک میں وائرس سے سب سے زیادہ متاثرہ علاقہ ہے۔
نامہ نگار کریم الاسلام کے مطابق اتوار کو صوبے میں جن افراد میں کورونا وائرس کی تصدیق ہوئی ان میں سے 39 کا تعلق ان زائرین سے ہے جو ایران سے پاکستان آئے ہیں۔ اب تک مجموعی طور پر 260 زائرین میں کووڈ-19 کی تصدیق کی گئی ہے۔
اس کے علاوہ کراچی میں بھی تین نئے مریض سامنے آئے جس کے بعد دارالحکومت میں متاثرین کی تعداد 133 ہو گئی ہے۔ ان میں سے 88 افراد ایسے ہیں جن میں وائرس مقامی طور پر منتقل ہوا ہے۔ کراچی میں اب تک چار مریض صحت یاب جبکہ ایک ہلاک بھی ہو چکا ہے۔ اس کے علاوہ سندھ میں دادو میں بھی کورونا کا ایک مریض موجود ہے۔
پیر کو پنجاب میں بھی اس وائرس کے مزید 21 مریضوں کی تصدیق کی گئی ہے جس کے بعد وہاں متاثرین کی کل تعداد 246 ہو گئی ہے۔
نامہ نگار ترہب اصغر کے مطابق پنجاب کے وزیراعلیٰ کا کہنا ہے کہ صوبے میں اس وقت کورونا کے مریضوں کی اکثریت ڈیرہ غازی خان میں بنائے گئے قرنطینہ میں رکھے گئے زائرین کی ہے جن میں سے 177 میں وائرس کی تصدیق ہو چکی ہے۔
اس کے علاوہ لاہور میں 52 افراد میں وائرس کی تصدیق ہوئی ہے جبکہ گوجرانوالہ اور گجرات میں چار، چار، راولپنڈی اور جہلم میں تین تین، ملتان میں دو جبکہ سرگودھا میں ایک مریض موجود ہے۔
خیبرپختونخوا میں بھی پیر کو کورونا وائرس کے سات نئے کیس سامنے آئے ہیں جس کے بعد صوبے میں متاثرین کی تعداد 38 ہو گئی ہے جبکہ اب تک تین افراد ہلاک بھی ہو چکے ہیں۔
نامہ نگار عزیز اللہ خان کے مطابق وزیراعلیٰ کے مشیر برائے اطلاعات اجمل وزیر نے بتایا ہے کہ نئے مریضوں میں سے تین کا تعلق پشاور اور دو کا مانسہرہ سے ہے جبکہ ایک ایک مریض بونیر اور کرک میں سامنے آیا ہے۔
مشیرِ اطلاعات کے مطابق صوبے میں 235 نئے مشتبہ کیس رپورٹ ہوئے ہیں جبکہ اب تک کروائے گئے 120 افراد کے ٹیسٹ کا رزلٹ نیگیٹیو آیا ہے اور 290 کا رزلٹ آنا ابھی باقی ہے۔
ڈیرہ اسماعیل میں لائے گئے زائرین میں سے 130 زائرین کے ٹیسٹ کلیئر ہو گئے ہیں جبکہ بقایا کے نتائج آنا باقی ہیں۔
وفاقی دارالحکومت اسلام آباد میں کورونا وائرس کے مزید چار مریض سامنے آنے کے بعد یہاں کووڈ-19 کے متاثرین کی تعداد 15 ہو گئی ہے جن میں سے دو صحت یاب ہو چکے ہیں جبکہ 13 زیرِ علاج ہیں۔
پاکستان انسٹیٹیوٹ آف میڈیکل سائنسز کے ڈاکٹر وسیم خواجہ نے بی بی سی سے بات کرتے ہوئے پیر کو چار نئے مریضوں کی شناخت کی تصدیق کی۔ ان کا کہنا تھا کہ ان تمام مریضوں کی حالت تسلی بخش ہے۔
گلگت بلتستان میں بھی پیر کو نو افراد کے کورونا ٹیسٹ مثبت آنے کے بعد وہاں مریضوں کی تعداد 80 ہو گئی ہے۔
وزیراعلیٰ کے ترجمان فیض اللہ فراق کے مطابق زیادہ تر مریضوں کا تعلق زائرین سے ہے
اس کے علاوہ بلوچستان میں 110 اور پاکستان کے زیرِ انتظام کشمیر میں ایک شخص میں اس وائرس کی تصدیق ہوئی ہے۔
پاکستان کی جانب سے اپنی فضائی حدود بند کیے جانے کے بعد کئی ممالک میں متعدد پاکستانی پھنسے ہوئے ہیں۔
وزیراعظم کے مشیر برائے قومی سلامتی معید یوسف نے کہا ہے کہ ان مسافروں کی واپسی یا ان کی وہیں رہائش کا انتظام کر دیا جائے گا تاہم مسافروں میں اس اعلان کے باوجود تشویش پائی جاتی ہے۔
ان میں سے کچھ وہ شہری ہیں جو ٹرانزٹ فلائٹس کے ذریعے ملک واپس آ رہے تھے مگر ٹرانزٹ ایئرپورٹ پہنچنے پر انھیں پتا چلا کہ اب فضائی حدود بند ہونے کے باعث متعلقہ ایئرلائن انھیں پاکستان نہیں پہنچا سکتی۔
تھائی ایئرلائن سے سفر کرنے والے 45 پاکستانی شہری تین دن سے بینکاک ایئرپورٹ پر موجود ہیں۔ بی بی سی سے بات کرتے ہوئے ان مسافروں میں شامل فخرِ عالم نے بتایا کہ ان کے ساتھ بزرگ بھی ہیں جن کی طبیعت خراب ہے۔
’ہم تین دن سے یہاں ہیں، پہلے دن کسی نے نہیں پوچھا، دوسرے دن سفارتخانے سے کچھ لوگ آئے اور یہ کہہ کر چلے گئے کہ ہم بات چیت کر رہے ہیں۔ اس کے بعد ان کا کچھ پتا نہیں تھا۔ پھر انھوں نے کھانا بھجوایا۔‘
بینکاک ایئرپورٹ پر ہی موجود ایک اور پاکستانی شہری محمد جہانگیر نے بھی بی بی سی سے بات کی اور کہا کہ سفارتخانے کا عملہ کھانا بھجوا رہا ہے اور کہہ رہا ہے کہ وہ کسی انتظام کی کوشش کر رہے ہیں۔
’لیکن تین دن سے ہم انھی بینچوں پر بیٹھے ہیں۔ سول ایوی ایشن اتھارٹی نے ابھی تک کوئی انتظام نہیں کیا۔‘
یہ مسافر جنوبی کوریا سے پاکستان آ رہے تھے اور بنکاک ایئرپورٹ سے ٹرانزٹ فلائٹ تھی۔ ایئرپورٹ پر موجود ان مسافروں میں خواتین اور بچے بھی شامل ہیں۔
جہانگیر بتاتے ہیں کہ ’سفارتخانے کے اہلکار آتے ہیں اور کھانا دے کر چلے جاتے ہیں۔ یہاں 51 پاکستانی تھے، جو استطاعت رکھتے تھے وہ واپس کوریا چلے گئے ہیں مگر ہم یہیں انتظار کر رہے ہیں۔‘
پیر کو وزیراعظم کے مشیر معید یوسف نے کہا کہ ان کے پاس دنیا بھر سے ان پاکستانی مسافروں کی اطلاعات آ رہی ہیں جو ٹرانزٹ پروازوں کی بدولت دیگر ممالک کے ایئرپورٹس پر پھنسے ہوئے ہیں۔
معید یوسف نے کہا کہ دنیا بھر میں کہیں بھی موجود پاکستانی اگلے دو ہفتو ں کے لیے واپسی کا سفر منسوخ کریں کیونکہ ملک کی فضائی حدود بند ہیں۔
سندھ کا دارالحکومت کراچی ہو یا حیدرآباد، ٹنڈوالہ یار یا جام شورو ہر جگہ سے شکایات یہی تھیں کہ پولیس نے زبردستی کریانہ، گوشت، دودھ اور سبزی کی بھی دکانیں بند کرادیں، باوجود اس کے لاک ڈاون سے قبل وزیر اعلیٰ، آئی جی سندھ، کمشنر کراچی اپنے پیغامات اور احکامات میں واضح کرچکے تھے کہ کھانے پینے کے اشیا کی دکانیں کھلی رہیں گی۔
پاکستان میں کورونا وائرس کے پھیلاؤ کو روکنے کی کوششوں کے سلسلے میں دارالحکومت اسلام آباد سمیت ملک بھر میں سول انتظامیہ کی مدد کے لیے فوج طلب کر لی گئی ہے۔
فوج کو پاکستان کے زیرِ انتظام کشمیر بھی تعینات کیا گیا ہے جہاں وہ کورونا سے تحفظ کی کوششوں کے لیے حکومت کی مدد کرے گی۔
وزارت داخلہ کی طرف سے پیر کو جاری کردہ نوٹیفیکیشن کے مطابق سول انتظامیہ کی مدد کے لیے پاکستانی فوج کے دستے تعینات کیے جا رہے ہیں۔
نوٹیفیکیشن کے مطابق فوج کو آئین کے آرٹیکل 245 کے تحت طلب کیا گیا ہے۔
وزارت داخلہ کے مطابق فوج سول انتظامیہ کی مدد کے لیے تعینات کی گئی جبکہ سول انتظامیہ نے اس کی درخواست کی تھی۔
بنوں میں پولیس نے کورونا وائرس پر غیر سنجیدگی کا مظاہرہ کرنے اور مزاحیہ نظم گانے پر دو علما سمیت تین افراد کو گرفتار کر لیا ہے۔
نامہ نگار عزیزاللہ خان کے مطابق ان پر کورونا وائرس کو دھوکہ قرار دے کر عوام کو ورغلانے، ملکی سلامتی کو نقصان پہنچانے اور اشتعال پھیلانے کے الزامات ہیں سٹوڈیو مالک بھی گرفتار کر لیا گیا۔
گذشتہ روز سوشل میڈیا پر کورونا وائرس کے حوالے سے نظم کی ایک ویڈیو وائرل ہوئی تھی جس میں مولوی عبدالجلیل اور بلال نے کورونا وائرس کو دھوکہ اور ڈرامہ تماشہ قرار دیا تھا اور عوام کو اس سے نہ ڈرنے اور احتیاط نہ کرنے کا کہا تھا۔
بنوں پولیس کے مطابق ڈپٹی کمشنر محمد زبیر نیازی اور ڈی پی او یاسر آفریدی نے اس کے خلاف کارروائی کے احکامات جاری کئے تھے۔
ان کے خلاف مقدمہ بھی درج کیا گیا ہے۔
چیئرمین این ڈی ایم اے محمد افضل نے کہا ہے کہ چین سے 125 ٹن سامان جمعے یا سنیچر کو پاکستان آ جائے گا اور اگلے دو دن میں ہر ہیلتھ ورکر کے پاس پی پی ای (ذاتی حفاظت کا سامان) ہو گا۔
ان کے مطابق 120 وینٹی لیٹرز جمعے کو پاکستان آئیں گے جبکہ دوسرے مرحلے میں وینٹی لیٹرز کی تعداد 1200 تک بڑھا دی جائے گی جبکہ تیسرے مرحلے میں یہ تعداد 4000 تک بڑھا دی جائے گی۔
چیئرمین این ڈی ایم اے کے مطابق باہر سے آنے والے سامان کے ساتھ ساتھ کچھ پاکستانی ادارے بھی ماسک، این 95 ماسک، گاؤن اور سینیٹائزز بنا رہے ہیں۔
ان کا کہنا تھا کہ کمپنی علی بابا کے مالک جیک ما پانچ لاکھ ماسک بھیجیں گے جن میں سے 50 ہزار این 95 ماسکس ہیں۔ اس کے علاوہ ان کی طرف سے کورونا کی 50 ہزار ٹیسٹنگ کٹس کا تحفہ بھی دیا گیا ہے۔
چیئرمین این ڈی ایم اے کا کہنا تھا کہ اگلے چند دنوں میں پاکستان میں امدادی سامان کے سٹاک کی پوزیشن اتنی مستحکم ہو جائے گی کہ تقریباً ایک ماہ تک بیماری سے لڑا جا سکے گا۔
پاکستان کے زیر انتظام کشمیر کے وزیراعظم راجہ محمد فاروق حیدر خان نے آج رات 12 بجے سے کشمیر بھر میں تین ہفتوں کے لیے مکمل لاک ڈاؤن کا اعلان کیا ہے۔
وزیر اعظم ہاؤس سے جاری کیے گئے اعلامیے کے مطابق عوام کے غیر ضروری سفر کرنے اور باہر نکلنے پر پابندی ہو گی اور ہر قسم کی ٹرانسپورٹ مکمل طور پر معطل رہے گی۔
اعلامیے میں کہا گیا کہ ناگزیر حالات میں سفر کرنے کے لیے خصوصی پاسز جاری کیے جائیں گے اور کھانے پینے کا سامان لانے کے لیے گھر کے ایک فرد کو اجازت ہو گی۔
وزیر اعظم کے بیان کے مطابق صرف محکمہ صحت پولیس انتظامیہ اور اشیا خوردونوش کا سامان جبکہ صحافیوں کو خصوصی پاسز جاری کیے جائیں گے۔
سندھ کے صوبائی وزیر سعید غنی نے اپنی ایک ویڈیو جاری کی ہے جس میں انھوں نے بتایا ہے کہ ان میں کورونا وائرس کی تشخیص ہوئی ہے۔
انھوں نے کہا ہے کہ وہ آئسولیشن میں جا رہے ہیں تاکہ یہ بیماری دوسروں تک نہ پھیل سکے۔
خیال رہے کہ سعید غنی حالیہ چند دنوں کے دوران کورونا وائرس سے بچاؤ کی ٹاسک فورس اور پیپلز پارٹی کے اجلاسوں میں شرکت کرتے رہے ہیں۔
پنجاب میں محکمۂ صحت کے حکام کے مطابق صوبے میں کورونا وائرس کے مریضوں کی تعداد میں 21 افراد کا مزید اضافہ ہوا ہے جس کے بعد متاثرین کی کل تعداد 246 تک پہنچ گئی ہے۔
پنجاب کے وزیراعلیٰ کا کہنا ہے کہ صوبے میں اس وقت کورونا کے مریضوں کی اکثریت ڈیرہ غازی خان میں بنائے گئے قرنطینہ میں رکھے گئے زائرین کی ہے جن میں سے 177 میں وائرس کی تصدیق ہو چکی ہے۔
اس کے علاوہ لاہور میں 52 افراد میں وائرس کی تصدیق ہوئی ہے جبکہ گوجرانوالہ اور گجرات میں چار، چار، راولپنڈی اور جہلم میں تین تین، ملتان میں دو جبکہ سرگودھا میں ایک مریض موجود ہے۔