राज ठाकरेंचं देवेंद्र फडणवीसांना पत्र, टोमणा की सांत्वन?

देवेंद्र फडणवीस यांचे अभिनंदन, असं म्हणत महाराष्ट्र नवनिर्माण सेनेचे प्रमुख राज ठाकरे यांनी उपमुख्यमंत्री देवेंद्र फडणवीस यांना पत्र लिहिलं आहे.

राज ठाकरे ट्विटरवर हे पत्र शेयर केलं आहे.

त्यात ते लिहितात, "महाराष्ट्राचे उप-मुख्यमंत्री म्हणून जबाबदारी स्वीकारल्याबद्दल आपले अभिनंदन. वाटलं होतं की तुम्ही महाराष्ट्राचे मुख्यमंत्री म्हणूनच पुन्हा परताल, पण ते व्हायचं नव्हतं. असो...

"तुम्ही यापूर्वी पाच वर्षं महाराष्ट्राचे मुख्यमंत्री म्हणून काम केलं. आत्ताचं सरकार आणण्यासाठीही अपार कष्ट तुम्ही उपसलेत आणि इतकं असूनही आपल्या मनातील हुंदका बाजूला सारून पक्षादेश शिरसावंद्य मानून उप-मुख्यमंत्रिपदाची सूत्रं हातात घेतलीत. पक्ष, पक्षाचा आदेश हा कुठल्याही व्यक्तीच्या आकांक्षेपेक्षा मोठा आहे, हे तुम्ही तुमच्या कृतीतून दाखवून दिलंत. पक्षाशी बांधिलकी म्हणजे काय असतं त्याचा हा वस्तुपाठच आहे. ही गोष्टे देशातील आणि राज्यातील सगळ्या राजकीय पक्षांनी आणि कार्यकर्त्यांनी कायमस्वरुपी लक्षात ठेवण्यासारखी आहे.

"ही बढती आहे की अवनती यात मी जात नाही आणि कुणी जाऊही नये. पण एक सांगतो की, धनुष्यातून ध्येयाचा वेध घ्यायचा तर दोरी मागे ओढावी लागते. ह्या मागे ओढलेल्या दोरीला कुणी माघार म्हणत नाही! तुम्हाला यापुढेही बराच राजकीय प्रवास करायचा आहे.

"एक निश्चित की तुम्ही तुमचं कर्तृत्व महाराष्ट्रापुढे सिद्ध केलेलंच आहे. त्यामुळे देशाच्या भल्यासाठीही तुम्हाला अधिक काम करण्याची संधी मिळो. हीच आई जगदंबेचरणी प्रार्थना."

हेही वाचलंत का?

(बीबीसी न्यूज मराठीचे सर्व अपडेट्स मिळवण्यासाठी आम्हाला YouTube, Facebook, Instagram आणि Twitter वर नक्की फॉलो करा.

बीबीसी न्यूज मराठीच्या सगळ्या बातम्या तुम्ही Jio TV app वर पाहू शकता.

'सोपी गोष्ट' आणि '3 गोष्टी' हे मराठीतले बातम्यांचे पहिले पॉडकास्ट्स तुम्ही Gaana, Spotify, JioSaavn आणि Apple Podcasts इथे ऐकू शकता.)