Ўзбекистон: Парижданда қиммат, тугатилган рейслар ва гижжаларга қарши ялпи кураш — янгиликлар O‘zbekiston dunyo yangiliklar

Тошкентдаги нархлар Париж ва Римдагисидан қолишмайдими? Ўзбекистондан энди қаерларга учиб бўлмайди ва мамлакатда қанча одам жавобгарликка тортилди - bbcuzbek.com дайжести.

Тошкентда апельсин нархи Лондон ва Римдагидан, банан Париж ва Москвадаги, ўсимлик ёғи эса Берлин ва Прагадаги нархлардан сезиларли қиммат.

Ўзбекистон пойтахтдаги айрим озиқ-овқат маҳсулотлари нархларини 16 та МДҲ ва Европа давлатларининг пойтахтларидаги нархлар билан солиштирган Прогнозлаштириш ва макроиқтисодий тадқиқотлар институти ана шундай хулосага келган.

Институт ходимлари Тошкентнинг тўрт савдо нуқтасидаги қишлоқ хўжалиги ва чорвачилик маҳсулотлари нархларини ўрганганлар.

28 турдаги маҳсулотнинг апрель ойидаги нархлари февраль ойидаги ҳолат билан билан қиёсланган.

Натижада, 17 турдаги маҳсулот, жумладан, гўшт, тухум, ўсимлик ёғи икки ой ичида сезиларли қимматлагани аён бўлган.

Ўрганиш давомида маҳсулотларнинг савдо нуқтасидаги энг минимал нархлари ҳисобга олинган.

Институт нархлари бўйича хавотир уйғотувчи 10 та маҳсулот номини келтирган.

Апельсин, лимон, қадоқланган сут, ўсимлик ёғи, макарон, мол гўшти каби бу маҳсулотлар нархлари Тошкентда айрим МДҲ ва Европа давлатлари пойтахтларидагиданда қиммат бўлиб чиққан.

Масалан, Тошкент супермаркетларидаги бир килограмм маргариннинг минимал нархи $2,2 бўлса, бу кўрсаткич Париж, Лондон, Мадрид ва Анқара каби шаҳарлардагидан ўртача 20,2 фоизга юқори экани аниқланган.

Ўсимлик ёғи эса Тошкентда Киев, Лондон, Прага, Москвадагидан қимматлиги кўринган.

Институт эълон қилган тадқиқот натижаларида нега Тошкентдаги нархлар ўсаётгани сабаби келтирилмаган.

Ниқобсиз одамлар

18 апрель куни Тошкент кўчаларида ниқобсиз юрган 773 фуқарога нисбатан баённомалар расмийлаштирилган.

818 одам эса ўрнатилган чекловлар тўғрисида огоҳлантирилган.

17 апрель куни Ўзбекистонда карантин қоидалари кучайтирилиб, чеклов талабларига амал қилмаган шахслар қатъий жавобгарликка тортилиши эълон қилинган эди.

Рейслар тугатилди

Uzbekistan Airways Париж, Рим, Милан, Амрицар, Мумбай, Бангкок, Токио, Куала-Лумпур ва Жакарта каби шаҳарларга рейсларини ёпади.

Мазкур рейслар норентабел деб топилган.

Рейслар май ойидан тўхтатилиши режаланаётгани маълум қилинган.

Таъкидланишича, ушбу рейсларни тўхтатиш орқали компания йилига $12,3 миллион тежаб қолади.

Дегелминтизация

Ўзбекистонда 6,5 миллиондан зиёд болани қамраб олувчи ичак гельминтози касалланиши олдини олувчи оммавий тадбирлар - дегелминтизация бошланган.

Соғлиқни сақлаш вазирлигининг эслатишича, гельминтозлар инсон организмига паразит чувалчанглар (гижжалар) кириши натижасида юзага келади.

Вазирлик ҳозирда гижжаларнинг аниқланган 250 туридан 9 таси болаларда учраши, улар болада қорин оғриғи, иштаҳасизлик, асабийлик келтириб чиқаришини билдирган.

Режага кўра, тадбирларнинг 1-тури 19—24 апрель кунлари давом этади.

Оммавий дегелминтизациянинг 2-тури эса 6 ойдан сўнг ташкил қилинади.

Ўзбек тили - миллий қадрият

Ўзбекистонда давлат тили миллий қадриятга тенглаштирилиб, унга нисбатан ҳурматсизлик, уни камситиш ва бузиб талқин қилинишига йўл қўймаслик белгиланмоқда.

Қонунчилик палатаси депутатлари «Давлат тили ҳақида»ги қонунга киритилаётган ўзгаришларни кўриб чиққанлар.

Қонун лойиҳасига кўра, мамлакатдаги барча миллат ва элатларнинг тиллари ҳурмат қилиниши таъминланади, тил бўйича камситишга йўл қўйилмайди.

Шунингдек, давлат тилини билмаслиги туфайли фуқароларнинг ҳуқуқ ва эркинликлари чекланишига йўл қўймаслик ҳам белгилаб қўйилмоқда.

Бир вақтнинг ўзида, қонун лойиҳасида давлат органлари хизмат вазифаларини бажариш йўлида давлат тилини билмайдиган ўз ходимларига тилни ўрганиш учун шарт-шароит яратиши ҳам кўрсатиб ўтилган.

BBCUZBEK.COM билан Telegram орқали +44 7858860002 номери билан боғланинг.

Telegram каналимиз: https://t.me/bbcuzbek