Хитой: Ҳалокатли вирус тарқалган Уханда 30 ўзбекистонлик қамалиб қолган

Ўзбекистон Ташқи ишлар вазирлигининг хабар беришича, Хитойнинг ёпиб қўйилган Ухан шаҳрида 30 ўзбекистонлик талаба қамалиб қолган бўлиши мумкин. Хитой Ухандан ташқари яна 9 шаҳарни ёпиб қўйди. Ҳалокатли вирус бошқа мамлакатларга ҳам тарқалмоқда.

Ташқи ишлар вазирлигининг хабар беришича, Ухан шаҳрида 250 нафар атрофида асосан ўзбекистонлик талабалар яшайди.

Талабаларнинг кўпчилиги семестр якунланганлиги учун Ўзбекистонга таътилга қайтишган.

"Элчихона маълумоти бўйича ҳозирда шаҳарда 30 ортиқ Ўзбекистон фуқаролари бўлиши мумкин", дейилади вазирлик хабарида.

Уларга консуллик-ҳуқуқий ёрдам кўрсатиш учун Wechat ижтимоий тармоғида " Uxan 2020 Oʻzbekiston" гуруҳи тузилган.

Хитой оқибати ўлим билан якунланаётган вирус ўчоғи бўлган Ҳубей вилоятида ҳаракатланишга чекловларини кенгайтирди. Ҳозиргача 10 та шаҳар ёпилди, уларнинг орасида вирус пайдо бўлган Ухан ҳам бор. Касалликдан ўлганлар сони 26 нафарга етди.

Пайшанба куни Ҳебей вилоятидан короновирус юқтирган хаста вафот этди. У касаллик тарқалган Ҳубей провинцияси ташқарисидаги илк ўлим ҳолати бўлди.

Кейинчалик шимолий шарқдаги Ҳейлонгжианг вилоятида яна бир беморнинг ўлгани тасдиқланди.

Ушбу вилоят Россия билан чегарадош ва касаллик пайдо бўлган Ухандан 2 минг чақирим узоқликда.

Мамлакат бўйлаб 830 одамнинг вирус юқтиргани тасдиқланган.

Хитойдан ташқари Таиланд, АҚШ, Тайван, Шимолий Корея, Япония, Вьетнам ва Сингапурда ҳам ушбу касалликка чалинган беморлар қайд қилинди.

Ҳаракатланишга чекловлар хитойликларнинг янги йил байрамига тўғри келган. Бу байрам Хитойда кенг нишонланади ва миллионлаб одам уни ўтказиш учун қишлоғига йўл олади.

Ҳаракатланишга тақиқ шаҳардан шаҳарга кўчмоқда.

Ухан бутунлай ёпиб қўйилган. Барча автобус, метро, паром хизматлари тўхтатилган. Шаҳардан ташқарига чиқувчи учоқ ва поездлар бекор қилинган.

Шаҳарликларга уни тарк қилмаслик маслаҳат берилди, йўлларга назорат нуқталари ўрнатилгани айтилмоқда.

Хубейдаги унча катта бўлмаган Эчжоу шаҳри темир йўл станциясини ёпди. Энши шаҳрида эса барча автобус хизматлари тўхтатилди.

Пекин ва Шанхай шаҳри расмийлари касаллик тарқалишининг олдини олиш учун вирус тарқалган минтақалардан келган фуқароларни 14 кун уйдан чиқмай туришга чақирди.

Короновирусни тўхтатиб бўладими?

Би-би-сининг Саломатлик ва фан мухбири Жеймс Галлаҳердан таҳлил:

Бу ўз-ўзидан куйиб йўқ бўлиб кетадиган вирус эмаслигини биламиз.

Хитой ҳукумати томонидан қабул қилинган шаҳарларни ёпиш қарорини ичига олган чоралар вируснинг фақат тарқалиб кетишини тўхтатиши мумкин.

Олимлар касалликка чалинган бир одам, ўртача 1.4 дан 2.5 кишигача вирусни юқтириши мумкинлигини аниқлашди.

Бу вируснинг тарқалишида асосий кўрсатгич ҳисобланади. 1.0 дан баланд бўлган ҳар қандай кўрсатгич вируснинг кучлилигини англатади.

Бу дастлабки рақамлардир, бироқ короновирусни САРС вируси билан бир қаторга қўйиш мумкин. Муҳим савол кун тартибида турибди - вирус юқтирганлар кимлар ва улар улар буни қачон юқтирган.

Албатта, бу САРСдан камроқ хавфли, бироқ касалланганларни аниқлаш қийин бўлса ва аломат кўринмаган ҳолатларда ҳам вирус юққан бўлса уларни назорат қилиш қийин бўлади.

Биз одамлар қачон вирус юқтирганини билмаймиз. У симптомлар пайдо бўлгандан олдин бўладими ёки ундан кейин? Бу нарса касаллик тарқалишини тўхтатишни яна-да қийинлаштиради.

Короновирус таъсири фақат Хубей вилоятида чекланиб қолмаяпти. Расмийлар йирик сайёҳлик марказларини ҳам ёпиб қўймоқда. Пекиндаги Тақиқланган шаҳар сайёҳлик маркази, Буюк Хитой девори ва мамлакатнинг бўйлаб йирик тадбирлар бекор қилинди.

BBCUZBEK.COM билан Telegram орқали +44 7858860002 номери билан боғланинг.

Telegram каналимиз: @bbcuzbek