عبدالرشید شکور، مناء رانا بی بی سی اردو ڈاٹ کام، کراچی، لاہور

	وولمر کے قتل سے پاکستانی کرکٹ انتہائی نازک موڑ پر آ کھڑی ہوئی ہے

پاکستان کرکٹ بورڈ کے سابق چیف ایگزیکٹو عارف عباسی کا کہنا ہے کہ پہلے ہی پاکستانی کرکٹ بے شمار تنازعات میں الجھتی رہی ہے۔ اب اس واقعے کا بہت برا اثر پڑے گا۔

عارف عباسی کے مطابق وولمر کی پراسرار قرار دی جانے والی موت نے کئی سوالات سامنے رکھ دیے ہیں۔ انہوں نے کہا کہ اس واقعے نے آئی سی سی کے نام نہاد اینٹی کرپشن یونٹ کی قلعی کھل دی ہے جو سکیورٹی کے بارے میں بلند بانگ دعوے کرتا رہا ہے۔ ورلڈ کپ جیسے اہم ایونٹ میں غیرمعمولی سکیورٹی ہوتی ہے اس کا کیا بنا؟ اس کے علاوہ ہوٹل کی اپنی سکیورٹی ہوتی ہے وہ کہاں غائب ہوگئی؟ ان پہلوؤں کو کیسے نظرانداز کیا جاسکتا ہے۔

اس واقعے نے آئی سی سی کے نام نہاد اینٹی کرپشن یونٹ کی قلعی کھل دی ہے جو سکیورٹی کے بارے میں بلند بانگ دعوے کرتا رہا ہے۔ ورلڈ کپ جیسے اہم ایونٹ میں غیرمعمولی سکیورٹی ہوتی ہے اس کا کیا بنا؟ اس کے علاوہ ہوٹل کی اپنی سکیورٹی ہوتی ہے وہ کہاں غائب ہوگئی؟۔ان پہلوؤں کو کیسے نظرانداز کیا جاسکتا ہے   عارف عباسی

عارف عباسی کے خیال میں پاکستان سے کسی قانون دان کو فوری طور پر ویسٹ انڈیز بھیجا جاتا تاکہ وہ وہاں ہونے والی تحقیقات میں شریک ہوکر اپنے کرکٹرز کو مشکل سے نکالے رکھتا لیکن چونکہ کرکٹ بورڈ اس وقت خالی ہے لہذا اب اطلاع یہ ہے کہ امریکہ سے کوئی سفارت کار ویسٹ انڈیز جارہا ہے۔

پاکستان کرکٹ بورڈ کے سابق چیئرمین لیفٹننٹ جنرل (ریٹائرڈ) توقیر ضیاء نے بی بی سی سے بات کرتے ہوئے کہا کہ تحقیقات مکمل ہونے سے پہلے اس حساس معاملے پر کچھ کہنا مناسب نہیں ہے تاہم ہونا یہ چاہیے تھا کہ پاکستان سے کوئی تحقیقاتی ٹیم وہاں جاتی اور مشکل صورتحال سے دوچار پاکستانی ٹیم کی مدد کرتی۔

توقیرضیاء نے کہا کہ اس وقت بے یقینی کی صورتحال ہے۔ پاکستان کرکٹ بورڈ کے چیئرمین ڈاکٹر نسیم اشرف استعفیٰ دے کر گھر چلے گئے ہیں۔ انہیں چاہیے کہ جب تک استعفیٰ منظور نہیں ہوجاتا، وہ قذافی سٹیڈیم میں آکر بیٹھیں اور حالات سنبھالنے کی کوشش کریں کیونکہ اس مشکل گھڑی میں ٹیم کو وہاں کیسے چھوڑسکتے ہیں انہیں اخلاقی مدد کی اشد ضرورت ہے جس کی فراہمی ہماری ذمہ داری ہے۔

پاکستان کرکٹ بورڈ کے ایک اور سابق چیئرمین شہریارخان کہتے ہیں کہ باب وولمر کی موت جسے اب قتل قرار دیا جارہا ہے، پاکستانی کرکٹ پر منفی اثرات مرتب کرسکتی ہے کیونکہ وہ پاکستانی ٹیم کے کوچ تھے۔ اس میں کوئی شک نہیں کہ پاکستانی کرکٹ نازک دور سے گزررہی ہے۔

	اس مشکل گھڑی میں کھلاڑیوں کو اخلاقی مدد کی اشد ضرورت ہے: شہریار خان

کھلاڑیوں کے اہل خانہ کی پریشانی

اس بات کے انکشاف کے بعد کہ پاکستان کی کرکٹ کے کوچ باب وولمر کی موت طبعی نہیں بلکہ ان کا قتل کیا گیا اس سے پاکستان کے کرکٹ حلقوں میں تشویش پیدا ہوئی پاکستان کی کرکٹ ٹیم کے کھلاڑیوں کے گھر والوں کو بھی پریشان کیا۔

باب وولمر کی موت کی تحقیقات کے دوران جمیکا کی پولیس نے پاکستان کی ٹیم کے اراکین سے بھی الگ الگ پوچھ گچھ کی اور خبروں کے مطابق پاکستان کی ٹیم کے سسٹنٹ کوچ مشتاق احمد سے سب سے زیادہ پوچھ گچھ کی گئی۔

مشتاق احمد کی اہلیہ عظمی مشتاق کے مطابق یہ خبر سن کروہ پریشان ہوئیں کہ آخر مشتاق سے زیادہ لمبی تحقیقات کیوں کی گئیں لیکن مشتاق نے انہیں فون پر بتایا کہ ایسی کوئی بات نہیں اور یہ خبر غلط ہے اور ان سے تو بلکہ پولیس نے کم وقت بات کی۔

عظمی مشتاق کا کہنا تھا کہ باب وولمر بہت اچھے انسان تھے اور ان کے قتل کی خبر سے انہیں بہت دکھ پہنچا ہے۔

	جمیکا کی پولیس نے کھلاڑیوں سے پوچھ گچھ کی

محمد اکمل کے مطابق باب وولمر نے ہمیشہ کامران اکمل کو اعتماد دیا اور اسی لیے کامران نے کئی بار ٹیم کے لیے اچھی کارکردگی دکھائی۔ ان کا کہنا تھا کہ وولمر کا قتل بہت افسوس ناک واقعہ ہے اور انہیں اس کا بہت دکھ ہے۔

پاکستان کی ٹیم کے بیٹسمین شعیب ملک کے بھائی عمران ملک کے مطابق جب قتل ہوا ہے تو پولیس ہر طرح سے تحقیق کرے گی اس میں پریشان ہونے کی ضرورت نہیں کیونکہ اتنے بڑے واقعے کے بعد پوچھ گچھ کوئی بڑی بات نہیں اور پاکستان کی ٹیم کا چونکہ اس قتل سے کوئی تعلق نہیں لہزا اس میں پریشان ہونے کی قطعا ضرورت نہیں۔

پاکستان کی ٹیم کے سپن بالر دانش کنیریا کے بھائی وکی نے کہا کہ باب وولمر کا قتل بہت اداس اور دہلا دینے والی خبر ہے تاہم انہوں نے کسی بھی اور سوال کا جواب دینے سے انکار کیا جس سے معلوم ہوتا تھا کہ شہ بہت احتیاط سے کام لے رہے ہیں۔