شکیل اختر بی بی سی اردو ڈاٹ کام، دلی

	مشتعل ہجوم نے اس واقعہ میں ملوث ایک اہم ملزمہ کے مکان کو تباہ کر دیا

اکثر ملزموں نے انصاف نہ ملنے کے خدشے کے پیش نظر اس مقدمے کی سماعت منتقل کرنے کی درخواست کی تھی۔

جسنی سکینڈل کے معاملے کی سماعت کرتے ہوئے پیر کے روز سپریم کورٹ نے کہا کہ جن معاملوں کی تفتیشی کارروائی مکمل ہو چکی ہے اور جن میں ملزموں کے خلاف فرد جرم عائد کی جا چکی ہے انہیں پڑوسی ریاست پنجاب کے درالحکومت چندی گڑھ میں منتقل کر دیا جائے۔

عدالت نے یہ فیصلہ 14 میں سے 13 ملزموں کی درخواست کی بنیاد پر سنایا ہے۔ ملزموں نے اپنی درخواست ميں یہ خدشہ ظاہر کیا تھا کہ کشمیر ہائی کورٹ میں ان کے مقدمات میں انہیں انصاف نہیں مل سکے گا کیوں کہ انکا کیس لڑنے کے لیئے کوئی بھی وکیل تیار نہیں ہے۔

کشمیر جنسی سکینڈل ميں قومی تفتیشی ادارے سی بی آئی نے ریاستی انتظامیہ پولس اور سکیورٹی فورسز کے چودہ اعلی افسروں کے خلاف فرد جرم داخل کی ہے۔
ان اہلکاروں پر الزام ہے کہ انہوں نے سرینگر میں کئی کم سن لڑکیوں کا جبراً جنسی استحصال کیا ہے۔

این جی نے بھانڈا پھوڑ دیا  چند مہینے قبل یہ معاملہ اس وقت روشنی میں آیا جب ایک غیر سرکاری تنظيم نے اس واقعہ سے متعلق ایک ’پورنوگرافک‘ سی ڈی پولیس کو دی۔ جس میں 15 سے 16 برس کی لڑکیوں کو جنسی فعل کرتے دکھایا گیا تھا

اس معاملے پر پورے کشمیر میں زبردست غم و غصہ کی لہر دوڑ گئی تھی اور ایک مشتعل ہجوم نے اس واقعہ میں ملوث ایک اہم ملزمہ کے مکان کو تباہ کر دیا تھا۔

کیس کی نزاکت اور مشتعل عوامی جذبات کے پیش نظر ریاستی بار کونسل نے غیر رسمی طور پر یہ فیصلہ کیا تھا کہ وکیلوں کو ملزموں کا دفاع نہیں کرنا چاہیئے۔

سپریم کورٹ نے مقدمے کی منتقلی کی درخواست کی سماعت کرتے ہوئے بار کونسل سے یہ کہا تھا کہ وکلاء ملزموں کا دفا‏ع نہ کرنے کا فیصلہ کر کے وہ اپنے پیشہ ورانہ اصولوں سے انحراف کر رہے ہیں۔

مقامی کشمیری، جموں کشمیر ہائی کورٹ کی سماعت سے کافی مطمئن تھے اور انہیں امید تھی کہ اس واقعہ میں قصور واروں کو ضرور سزا ملے گی۔
ملزموں کی طرف سے مقدمہ منتقل کرنے کی کوششوں کے بارے میں مقامی لوگوں کایہی خیال ہے کہ اس سے مقدمہ کمزور ہو جائے گا۔ اور ملزم انصاف کے شکنجے سے نکل جانے میں کامیاب ہو جائیں گے لیکن قانونی ماہرین کا کہنا ہے کہ انصاف کے بنیادی تقاضوں پر عمل آوری کے لیئے مقدمے کی منتقلی نا گزیر ہو چکی تھی۔