شکیل اختر بی بی سی اردو ڈاٹ کام، دِلی

	ہندوستان نے گزشتہ ستمبر میں بین الاقوامی ایٹمی توانائی کے ادارے میں ایران کے خلاف ووٹ دیا تھا۔

ایران کے معاملہ اقوام متحدہ کی سلامتی کونسل میں لے جانے کے سوال پر اگر ووٹنگ ہوئی تو ہندوستان اس میں غیر جانبدار رہنے کی کوشش کرے گا۔

امریکہ اور جرمنی کے سفارتکار ہندوستان کی حمایت حاصل کرنے کے لئے گزشتہ دنوں دلی میں تھے اور اس وقت فرانس کے کئی سفارتکاروں نے ہندوستان کی وزارت خارجہ کے اہلکاروں سے بات چیت کی ہے۔

ہندوستان چاہتا ہے کہ کسی طرح ایران کے معاملے پر ووٹنگ نہ ہو۔ اس کی اتحادی بائيں بازوں کی جماعتوں ہی نے نہیں حزب اختلاف نے بھی واضح کر دیا ہے کہ وہ بقول ان کے امریکہ کے کسی دباؤ میں کام نہ کرئے۔

دوسری جانب اگر وہ ایران کی حمایت میں ووٹ دیتا ہے تو اس سے نہ صرف ہند امریکہ جوہری معاہدے کی منظوری خطرے میں پڑ سکتی ہے بلکہ آئندہ مارچ کے اوائل میں صدر جارچ بش کے دورہ ہند پر بھی اس کے منفی اثرات ابھی سے پڑ سکتے ہیں۔

ایران کا معاملہ ہندوستان اور امریکہ کے درمیان پہلے ہی تلخی پیدا کر چکا ہے۔ گزشتہ ہفتے امریکہ کے سفیر ڈیوڈ ملفرڈ نے کہا تھا کہ اگر ہندوستان ہند امریکہ معاہدے کی منظوری چاہتا ہے تو وہ امریکہ کی حمایت کرے۔ ہندوستان کے ذبردست احتجاج کے بعداگر چہ انہوں نے یہ کہا تھا کہ ان کے بیان کو غلط تناظر میں پیش کیا گیا ہے لیکن ماہرین کا کہنا ہے تھا کہ امریکہ نے ان کے بیان کے ذریعے ہندوستان پر واضح کر دیا تھا کہ اسے کیا موقف اختیار کرنا ہے۔

ہندوستان نے گزشتہ ستمبر میں بین الاقوامی ایٹمی توانائی کے ادارے میں ایران کے خلاف ووٹ دیا تھا۔ اور ماہرین کا خیال تھا کہ اس نے یہ قدم امریکہ سے کسی مفاہمت کے تحت اٹھایا تھا۔

نیوکلیئر پالیسی کے سرکردہ تجزیہ کار پرفل بدوائی کا کہنا ہے کہ ہندوستان کے لئے یہ بہت اہم گھڑی ہے ۔’اگر اس نے ایران کے معاملے میں امریکہ کا کسی طرح کا بھی دباؤ قبول کر لیا تو وہ مستقبل میں کبھی بھی دیگر معاملات میں بھی وہ اس کی مزامحت نہیں کر پائے گا۔‘