سوتک بسواس بی بی سی نیوز، سرینگر

	ماہرین نفسیات ظفر سے زیادہ سوال نہیں کر رہے

ظفر خان کشمیر میں زلزلے کے بعد سے اس ہسپتال میں زیر علاج تھے۔ ہسپتال کے عملے کو اس بچے کے رشتہ داروں کے بارے میں کچھ معلوم نہیں جسے اڑی کے گاؤں سے زخمی حالت میں جہاز کے ذریعے سرینگر پہنچایا گیا تھا۔

ہسپتال میں موجود ظفر خان کے پڑوسیوں سے اتنا ضرور معلوم ہوا کہ ان کے والد کا زلزلے کے بعد مکان کے ملبے کے نیچے دبنے سے انتقال ہو گیا تھا۔ انہوں نے یہ بھی بتایا کہ ظفر خان کے دو بھائی ہیں اور والدہ نابینا ہیں جو زیادہ حرکت نہیں کر سکتیں۔

ڈاکٹروں کی بین الاقوامی تنظیم میڈسن سان فرنٹیرز (ایم ایس ایف)سے تعلق رکھنے والے ماہرین نفسیات اب ظفر خان سے زیادہ سوال نہیں کر رہے۔

لوگ ظفر خان کے لیے رنگ برنگے تحفے تحائف لے کر آ رہے ہیں۔

ڈاکٹروں نے ظفر خان کو اس کے گاؤں کے ہی دو بھائیوں امتیاز(12) اور اشتیاق(6) کے ساتھ والا بستر دیا ہے۔

امتیاز اور اشتیاق اپنا گھر گرنے سے زخمی ہوئے تھے۔ امتیاز کی ٹانگ کو فریکچر ہوا تھا جبکہ اشتیاق کے سر پر چوٹ لگی اور اس کو ہسپتال میں پہلے کچھ روز بیہوشی کے دورے پڑتے رہے۔

	شیدا بانو

ایک ماہر نفسیات کے مطابق امتیاز زلزلے سے ہونے والے نقصان کا براہ راست مقابلہ کر رہا ہے۔ وہ سپاٹ لہجے میں کہتا ہے کہ اس کی بہنوں، دوستوں اور بزرگوں کا انتقال ہو گیا ہے۔

ظفر سب سے زیادہ کھلنڈرا ہے۔ نظمیں پڑھتا ہے، گانے گاتا ہے اور آنے والوں کو سیاہ چشما لگا کر متاثر کرنے کی کوشش کرتا ہے۔

'مجھے گھر جانا ہے، گھر زیادہ اچھا ہے' ظفر کمزور سی مسکراہٹ کے ساتھ بولا۔

امتیاز اور اشتیاق کچھ دنوں میں اپنے والد کے ساتھ چلے جائیں گے لیکن ظفر کے لیے شاید کوئی نہ ہو جس کے پاس وہ جا سکے۔

ایک ہفتہ گزر جانے کے بعد بھی ظفر کا کوئی رشتہ دار اس سے ملنے نہیں آیا۔

ایم ایس ایف کے ساتھ کام کرنے والی ایک رضاکار عروج نے کہا کہ ظفر کو اگر کوئی لینے نہ آیا تو اسے کسی یوتھ ہاسٹل میں بھیج دیا جائے گا۔

ظفر زلزلے کے ان بہت سے بچوں میں سے ہے جنہیں انتہائی غیر یقینی مستقبل کا سامنا ہے۔

قدرت شاید پندرہ سالہ ممتاز احمد اور اس کی سات سالہ بہن روبینہ کے ساتھ اس سے زیادہ ظلم نہیں کر سکتی تھی۔ ان دونوں کا اب ایک دوسرے کے سوا کوئی نہیں۔ دونوں کے والدین چند ماہ پہلے انتقال کر گئے تھے۔

ممتاز اپنی تھوڑی سی زمین پر کھیتی باڑی کر کے اور مزدوری کر کے کام چلا رہا تھا۔ لیکن ان بچوں کو ایک تسلی تھی کہ ان کے سر پر چھت ہے۔ گزشتہ ہفتے زلزلے نے ان کا گھر تباہ کر دیا اور ربینہ کا دایاں ہاتھ بھی شدید زخمی ہوگیا جو بعد میں کاٹنا پڑا۔

	مجاز کو امید ہے کہ اس کے والدین ضرور آئیں گے

ممتاز نے اپنے دوسرے بہن بھائیوں کے بارے میں امید ظاہر کی کہ وہ فارم پر ہی ہوں گے۔

ایک مقامی بنک نے اسے خرچہ کے لیے تئیس ڈالر دیے۔ حکومت نے ظاہر ہے اب تک اس کی کوئی مدد نہیں کی۔

اب وہ اپنی بہن کو ہسپتال سے لے کر کہاں جائے گا؟

'مجھے نہیں معلوم۔ مجھے ایک خیمہ چاہیے۔ دوسری صورت میں مجھے بنکر بنانا پڑے گا۔'

ہسپتال میں دوسرے بچے ارفا لون(10) اور ان کی بہن تبسم(14) خوش قسمت ہیں۔ ان کا ایک عزیز ان کا خیال رکھنے کے لیے ان کے پاس ہے۔

ایک ہفتے کی تلاش کے بعد ان کے ایک عزیز ان تک پہنچ گئے ہیں۔ انہیں اپنی بہن فرزانہ کے بارے میں بھی معلوم ہو گیا ہے جو ایک دوسرے ہسپتال میں زیر علاج ہے اور ان کے والد اس کے پاس ہیں۔

قریب ہی ایک بستر پر شیدا بانو(12) نے زلزلے کے بارے میں ایک تصویر بھی بنائی ہے۔ تصویر میں لرزتا ہوا گھر اور ایک آدمی ہے جس کے اعضا واضح طور پر دکھائے گئے ہیں۔

	الطاف اپنی والدہ کے ساتھ

اس افسردہ وارڈ میں زندگی کی ایک کرن ہے۔ سات سالہ محمد الطاف کو جب ملبے سے نکالا گیا تھا وہ کومے میں تھے۔ ان کی والدہ ان کی بہن کے ہلاکت کی وجہ سے سکتے میں تھیں اور اب انہیں اپنا بیٹا ہاتھ سے نکلتا ہوا دکھائی دے رہا تھا۔

زلزلے کے ایک ہفتے کے بعد الطاف حسین مجزانہ طور پر صحتیاب ہو چکے ہیں۔ وہ آنے جانے والوں کو سیلوٹ کرتے ہیں اور ان کی والدہ ان کو خوشی خوشی اپنے خیمے میں لے جا رہی ہیں۔

تاجا کہتی ہیں کہ وہ خوش لوٹ رہی ہیں۔

ظفر خان کو شاید یہ خوشی نصیب نہ ہو۔