تاسې د وېبسایټ داسې بڼه ګورئ چې یوازې متن لري او لږ انټرنېټ کاروي. که غواړئ عکسونه او ویډیوګانې وګورئ، نو د وېبسایټ اصلي (لومړنۍ) بڼې ته ورشئ.
د وېبسایټ اصلي بڼې ته مې وروله
د وېبسایټ دې بڼې په اړه چې ډېر انټرنېټ نه مصرفوي نور معلومات دلته موندلای شئ.
حزب اسلامي: حکمتیار به په څو ورځو کې را څرګند شي
کابل کې د حزب اسلامي دفتر وایي، افغان حکومت د دغه ګوند د بندیانو نوملړ نهايي کړی او یو شمېر به یې ډېر ژر له بګرام او څرخي پله زندانونو خوشي شي.
حزب اسلامي وایي مشر یې، ګلبدین حکمتیار اوس د افغانستان په ختیځه سیمه کې دی او ډېر ژر به د خلکو په منځ کې ولیدل شي.
د حزب اسلامي لوړپوړي غړي وایي، شاوخوا دوه نیم زره غړي یې بندیان دي.
د حزب اسلامي د رسنیو د کمېټې مشر قریب الرحمان سعید بي بي سي ته وویل، راستنو شویو کډوالو ته یې ځمکې هم ځانګړې شوې او حکومت ورسره منلې چې د ښاغلي حکمتیار امنیتي کسان به هم د هغه د خپل ګوند غړي وي.
په کابل کې د حزب اسلامي لوړپوړي غړي پخوا له دولته ګیله من وو چې دوی ته په ورکړل شویو ژمنو یې عمل نه دی کړی، خو اوس د دغه ګوند غړي د پخوا پرتله خوښ معلومېږي.
ښاغلی سعید وایي، د دوی مشر ګلبدین حکمتیار به تر اتو یا لسو ورځو پورې د خلکو په منځ کې ولیدل شي. د افغان حکومت او حزب اسلامي د مشر ګلبدین حکمتیار ترمنځ د سولې تړون شاوخوا شپږ میاشتې مخکې لاسلیک شو.
له هغه وروسته څو ځله کابل ته د حزب اسلامي د مشر د راتګ خبرونه خپاره شول، خو تر اوسه نه دی راڅرګند شوی. افغان حکومت له حزب اسلامي سره د سولې تړون خپله لویه لاسته راوړنه بولي او له طالبانو هم غواړي چې ورته لاره خپله کړي.