Imvo n'imvano ku umurwi w'umupira w'amaguru witwa Mulenge FC mu mujyi wa Ottawa muri Canada

Muri iki kiganiro Imvo n'Imvano yo kuri uyu wa gatandatu tariki 8 z'ukwa 11 mu 2025, turakomeza uruhererekane rw'ibiganiro nagiye gukorera muri Canada mu kwezi kwa 9 k'uyu mwaka.

Uyu munsi Felin Gakwaya asubira mu mujyi wa Ottawa aho yasanze umurwi w'umupira w'amaguru witwa Mulenge FC uri mu cyiciro cya 2 cy'irushanwa ry'umupira w'amaguru muri Canada, ubwo yasanze umaze gutsindira igikombe cy'imirwi yo mu mijyi itandukanye yo muri Canada.

Icyo gikombe cyakinirwaga mu mujyi wa Winny Peg mu ntara ya Monitoba, bagitwara ari ku cyumweru tariki 31 z'ukwezi kwa 8 muri uyu mwaka. Batsinze umurwi uvuye mu mujyi wa Edmonton igitero 1-0.

Mulenge FC yatangiye ku mugaragaro mu 2020. Itangizwa n'urubyiruko rwiganjemo abana b'abanyamulenge bakomoka muri Kivu y'amajyepfo muri Repubulika ya Demokarasi ya Congo.

Muri iyi myaka 5 bamaze batangiye gukina amarushanwa, bamaze gutwara ibikombe 5. Mw'irushanwa ryo muri uyu mwaka muri Division ya 2 barangije bari ku mwanya wa 6. Uyu murwi wa Mulenge FC, ntamfashanyo wari wabona kuva watangira, ibyo bigatuma abawugize bishakamo ubutunzi bufasha uyu murwi gukora ibikorwa byawo.

Mu migambi bafite y'ejo hazaza, harimo gushaka imfashanyo izafasha uyu murwi kugera ahantu heza, nko kuzajya mu cyiciro cya mbere. Barifuza kandi ko imiryango bakomokamo ibashyigikira.

Gakwaya yagiye kureba aho Mulenge FC yagiye kumurikira icyo gikombe batsindiye mu mujyi wa Winny Peg abakunzi bayo maze ahitamo abo bajyana muri studio gukora iki kiganiro.

Yahisemo Santos Bigabo, icyegera cy'umurwi wa Mulenge FC kuko umuyobozi wayo atabonetse, ahitamo umutoza wayo Nzovu Sebagabo, hamwe rero na capitaine wayo Fabrice Rugenerwa.

Iki kiganiro mwagiteguriwe kandi mugiye kukigezwaho na Felin Gakwaya.