Os nad oes gwaith wedyn, does dim llawer o obaith. Dyma fynd i ofyn i rai fusnesau Pen Llyn am eu hymateb nhw i'r dirwasgiad yma.

Mae Iain a Wilma Roberts yn rhedeg Gwesty Tŷ Newydd Aberdaron a'r wythnos yma'n cael agoriad swyddogol y balconi newydd a'r gwelliannau i'r ystafelloedd gwely, 11 ohonynt gyda golygfa o'r mor ac i gyd yn 'en suite'.

Mae Iain yn hyderus fod y busnes yn mynd o nerth i nerth.

"Y tywydd, hwnnw sy'n mynd i ddylanwadu ar sut eith y busnes yn fama. Dwi'n eitha calonogol, mae'r bunt yn wan, a mae hynny am ddenu ymwelwyr tramor. Mae gen i Americaniaid newydd fwcio 3 noson ym mis Ebrill".

Mae'r busnes adeiladu, er yn iawn ar hyn o bryd, yn bryderus am y dyfodol. Ofni'r gwaetha mae nhw ar gyfer diwedd yr haf a'r flwyddyn nesaf. Ond beth sy'n eu poeni'n fwy na'r dirwasgiad yw'r rhwystrau sydd arnynt rhag gallu cystadlu am gontractau'r sector gyhoeddus.

Mae Cyngor Gwynedd hefyd yn cydnabod fod na waith i'w wneud i sicrhau fod mwy o gontractau'r Cyngor yn mynd i fusnesau lleol.

Mae gan y Cyngor bolisi o 'gaffael cynaliadwy' h.y. bod rhaid rhoi ystyriaeth i bethau cymdeithasol yn ogystal a phris wrth osod gwaith.

Er hynny, yn aml ae busnesau lleol yn ei chael yn anodd i ennill contractau.

Mae Llyr Hughes o Fferyllwyr Llyn yn rhedeg y fferyllfa yn Nefyn, "Dwi'n meddwl ein bod ni mewn gwell sefyllfa na'r cwmnïau mawr PLC. Mae ganddyn nhw gyfranddalwyr ac yn dibynnu ar y marchnadoedd arian a'r banciau. Dwi'n meddwl ei bod hi'n fantais bod yn gwmni bach, annibynnol, y dyddiau yma.

"Yr haf yma dwi'n amau fydd pethau'n dechrau cael effaith arnon ni. Dyna pryd mae pobl yn dod i lawr o Fanceinion a Chaer ac yn gwario y siop. Os na fydd ganddyn nhw bres i wario mi fydd hi'n tynhau arnon ninnau. Dyna pryd rydyn ni'n gallu gwneud ein harian fel arfer.

"Mae gen i un fantais, mae gynnon syniad da beth sydd o'n blaenau ac mi fydd rhaid i ni gael strategaeth i ddelio a'r sefyllfa."

Mae ffarmio'n gwneud yn well ar adega ddirwasgiad. Mae pawb yn gorfod bwyta. Er bod prisiau disl, llwch a bwydydd anifeiliaid i fyny mae prisiau defaid a biff wedi codi, mae'r ffermwyr yn edrych ymlaen at ddyddiau gwell i ddod. Mae'r grantiau Ewropeaidd hefyd yn uwch oherwydd gyfradd gyfnewid. Wrth i'r ewro gael ei newid i bunnoedd, mae 'na fwy o bunnoedd i'r ewro ac mae'r ffarmwr yn elwa o hynny.

Yr amgylchedd - dydy pobl heb bres ddim yn gallu llygru cymaint!

Does dim drwg nad ydy o'n dda i rhywun.