Видео: Путин янги таҳдид билан чиқди - Россия яна нима қилмоқчи? Украина Dunyo yangiliklar
Сурат манбаси, ANSA/TASS
Россия Президенти Владимир Путин Украина бандаргоҳларидан ғалла олиб чиқишни чеклаш кераклигини айтди. Путин баёноти ортидан жаҳонда дон нархи кўтарила бошлади.
Россия давлат раҳбари бу масалани Туркия Президенти Ражаб Тоййиб Эрдўғон билан муҳокама қилишга ваъда берди.
Шу йилнинг июль ойида БМТ ва Туркия аралашуви билан Украинанинг Қора денгиздаги портлари орқали дон маҳсулотларини олиб чиқиш йўлга қўйилганди.
"Украина ғалласи олиб чиқилиши учун қўлимиздан келганини қилдик. Буни Туркия билан бирга амалга оширдик. Агар Туркияни ўртадаги давлат бўлгани учун чиқариб ташласак, Украинадан олиб чиқилаётган доннинг деярли ҳаммаси ривожланаётган қашшоқ давлатларга эмас, балки Европа Иттифоқи мамлакатларига йўналтирилмоқда", деган Путин Владивостокда ўтаётган Шарқий иқтисодий анжуманда.
Айни мақолада Google YouTube томонидан тақдим қилинган контент мавжуд. Биз бу контент юкланмасидан аввал сизнинг розилигингизни сўраймиз, чунки улар куки ва бошқа технологиялардан фойдаланган бўлиши мумкин. Сиз Google YouTube ҳаволасида кукиларга доир ва шахсий маълумотларга оид қоидалар ҳақида аввал ўқиб, кейин қабул қилишга рози бўлишингиз мумкин. Кўриш учун “қабул қилиш ва давом этиш”ни танланг.
Охири YouTube пост
Путиннинг таъкидлашича, БМТнинг Жаҳон озиқ-овқат дастури линияси бўйича 87 кемадан фақат иккитасига ғалла юкланган.
"Уларда эса 2 миллион тонна дондан 60 минг тонна маҳсулот олиб чиқилди. Балки бу йўналиш (Европа) бўйлаб олиб чиқилаётган ғалла ва савдо маҳсулотини чеклашни ўйлаб кўриш керакдир. Бу бу масалани, албатта, Туркия президенти жаноб Эрдўғон билан маслаҳатлашаман", деган Путин ва Европа давлатларини ривожланаётган давлатларини алдовчи "мустамлакачи" деб атаган.
120 кунлик келишув
БМТ, Туркия воситачилигида тузилган келишув фақатгина 120 кун амал қилади. 22 июл куни Истанбулда унга Украина ва Россия имзо чекканди. Шундан сўнг Қора денгизда ғалла йўлаги очилган.
Унгача дон экспорти Россия ва Украина уруши сабаб экспорт қилинмай қолаётганди.
Истанбулда БМТ Бош котиби Антониу Гутериш Россия ва Украина ўртасидаги битим "очлик ёқасида қолаётган ҳимоясиз одамларга" енгиллик олиб келишини айтганди.
Бироқ ушбу одамларга ёрдам бериши керак бўлган ғалла унча кўп етиб бормаган.
Жаҳон озиқ-овқат дастури шафелигидаги 23 тонна ёрдам ортилган илк кема яқинда манзига етиб келди.
Айни дамда 37 тонна буғдойни Яманга етказиб беришга тайёр MV Karteria кемасига буғдой ортилган. БМТдаги расмийлар ушбу кемалар ортидан бошқалари ҳам йўлга чиқишига умид қилмоқда.
2021 йили БМТнинг Жаҳон озиқ-овқат дастури дунё бўйлаб 4.4 миллион тонна маҳсулот тарқатди. Уларнинг учдан икки қисми Украинадан келган.
Путиннинг сўнгги чиқишидан олдинроқ Россиянинг БМТдаги доимий вакили Василий Небензя Росия 120 кунлик битимни чўзмаслиги мумкинлигини айтганди.
"Битим 4 ойга тузилган ва у ноябр ойида тугайди. Одатда келишувни узайтириш керак. Натижаларни, тўғрироғи натижа йўқлигини ҳисобга олсак, мен ҳар нарса бўлиши мумкин дейман. Биз битимнинг Россия томонига оид қисми ҳам бажарилишини кўришни истаймиз. Ҳозирча бу йўқ", деган у.
Россия Истанбул битими доирасида Россия ғалласи ва ўғити экспортига қўйилган санкцияларни бекор қилишни талаб қилганди. ОАВ санкциялар юмшаши мумкинлигини айтганди, бироқ бу амалга ошмади. Келишув доирасида Россия ғалласи экспорт қилиндими, деган саволга Небензя "йўқ, ҳеч қандай", деб жавоб берди.
Европани айблаган Путин анжуманда дунёдаги озиқ-овқат билан боғлиқ муаммо кўлами фақат кескинлашиб боришини ва мисли кўрилмаган инсоний талофатларга олиб келиши мумкинлигини айтган.
Украина президенти маъмурияти раҳбари маслаҳатчиси Михаил Подоляк Путиннинг эътирозларига изоҳ бераркан, Россияда битимни қайта кўриб чиқишга асос йўқлигини айтди.
Унинг айтишича, келишув шартларига қатъий амал қилинмоқда. Подоляк Россия мавқеини "кутилмаган" ва "асоссиз" деган.
Telegram каналимиз: https://t.me/bbcuzbek
BBCUZBEK.COM билан Telegram орқали +44 7858860002 номери билан боғланинг.
