Швейцарияда янги йил кечасидаги ёнғинда ўнлаб киши ҳалок бўлди

Швейцариянинг жануби-шарқида жойлашган Кран-Монтана чанғичилик курортидаги барда чиққан ёнғин натижасида ўнлаб киши ҳалок бўлди. Шунингдек, Швейцария полицияси пайшанба кунги хабарда яна тахминан 100 киши жароҳат олганлигини маълум қилди.

Маҳаллий ОАВ пиротехникадан фойдаланиш ҳодисага сабаб бўлган бўлиши мумкинлигини истисно этмаяпти, аммо бу маълумот тасдиқланмаган.

Полиция хабар беришича, ёнғин маҳаллий вақт билан соат 1:30 да "Le Constellation" номли барда бошланган.

Швейцариянинг Blick нашри тахмин қилишича, ёнғинга концерт пайтидаги мушакбозлик сабаб бўлган бўлиши мумкин. Полиция ҳали ёнғин сабабини тасдиқламаган.

Ҳудуд тўлиқ ёпилган ва Кран-Монтана устидан бўладиган барча парвозлар тақиқланган. Ҳокимият бу ҳодисани террорчилик акти сифатида кўриб чиқмаётганини билдирди.

Blick нашрига кўра, портлаш пайтида барда 100 дан ортиқ киши бўлган.

Пресс-конференцияда Вале полицияси бошлиғи маълум қилишича, Швейцариядаги Le Constellation бардаги ёнғин натижасида тахминан 100 киши жароҳат олган.

Вале кантони бош прокурори Беатрис Пиллуд маълум қилишича, "ушбу фожиали вазиятга олиб келган ҳолатларни аниқлаш мақсадида" тергов олиб борилмоқда.

Унинг сўзларига кўра, қурбонларни аниқлаш ва жасадларни имкони борича тезроқ оилаларига қайтариш бўйича ишлар олиб борилмоқда.

Қутқарув операциясида 10 та вертолёт, 40 та тез ёрдам машинаси ва 150 нафар қутқарувчи иштирок этган.

Маълумотларга кўра, жабрланганларнинг кўпчилиги оғир жароҳатлар ва кучли куйишлар олган. Вале минтақавий кенгаши раиси Матиас Рейнарднинг айтишича, уларнинг аксарияти Вале шифохонасига етказилган, у ерда реанимация бўлими ҳозирда тўлиб кетган. Унинг сўзларига кўра, маҳаллий аҳоли шифокорларга ёрдам бериши мумкин, бунга ортиқча шифохонага мурожаат қилишдан сақланиш учун алоҳида эҳтиёткорлик кўрсатиш киради.

Швейцария ОАВ маълумотларига кўра, Кран-Монтанедаги портлашдан кейин Швейцария Давлат Кенгаши фавқулодда ҳолат эълон қилди.

Blick танишиб чиққанган Давлат Кенгаши Президиуми пресс-релизига кўра, яқин кунларда "барча зарур ресурсларни дарҳол сафарбар қилиш" ҳақида қарор қабул қилинган.

Би-би-си мухбири Сильвия Костело ҳодиса жойидан хабар беришича, ёнғин содир бўлган бар камида 40 йилдан бери фаолият юритиб келади.

Бу бар ёшлар учун мўлжалланган катта жой, аммо элита даражасида эмас. Шунга қарамай, у қимматбаҳо чанғичилик курортида жойлашган. 1980-йилларда бу курорт чанғи бўйича Жаҳон кубогини қабул қилган.

Барнинг ўзи анча катта: юқори қаватда футбол ўйинларини томоша қилиш учун телевизорлар ўрнатилган, пастки қаватда эса катта бар жойлашган. Маҳаллий ОАВ маълумотларига кўра, бинода тахминан 300 киши сиғиши мумкин.

Кран-Монтана - Швейцариянинг Вале кантонидаги элита чанғичилик курорти бўлиб, у ерда 130 километрлик трассалар мавжуд. Январ ойи охирида бу ерда чанғи бўйича тезликда тушиш бўйича нуфузли мусобақалар ўтказилиши режалаштирилган.