مناء رانا بی بی سی اردو ڈاٹ کام، لاہور

	شعیب اختر گھٹنے اورٹخنے میں تکلیف کے سبب بھارت کے خلاف ون ڈے سیریز نہیں کھیل سکے تھے

راولپنڈی ایکسپریس کے نام سے مشہور دنیا کے تیز ترین بالروں میں سے ایک شعیب اختر نے گھٹنے اور ٹخنے کے آپریشن کے بعد منگل کو نیشنل اکیڈمی لاہور میں بالنگ کی۔ انہوں نے چار اوورز پھینکے اور کہا کہ انہیں اس دوران کوئی تکلیف نہیں ہوئی۔

شعیب کے مطابق انہوں نے بالنگ کے دوران پچھتر فیصد زور لگایا اور رن اپ نسبتا چھوٹا تھا تاہم ان کا کہنا تھا کہ ایک ہفتے کے اندر اندر وہ پوری رفتار اور پورے رن اپ سے بالنگ کرانے کے قابل ہو جاؤں گا۔

شعیب اختر نے کہا کہ ان کی سرجری سے ان کی سپیڈ پر کوئی فرق نہیں پڑا بلکہ تکلیف سے چھٹکارہ پانے کے بعد وہ سپیڈ میں زیادہ بہتری محسوس کر رہے ہیں۔

دورہء انگلینڈ کے بارے میں شعیب اختر کا کہنا تھا کہ یہ دورہ کافی مشکل ہو گا۔ انگلینڈ کے خلاف وہاں کے حالات اور وکٹوں کے سبب فاسٹ بالرز کا کردار کافی اہم ہو گا۔ انہوں نے محمد آصف اور رانا نوید الحسن کی تعریف کرتے ہوئے کہا کہ دونوں کافی اچھی فارم میں ہیں دونوں ہی آج کل کاؤنٹی کھیل رہے ہیں جس سے انہیں مزید تجربہ حاصل ہو رہا ہے۔ شعیب کے مطابق ان دونوں کی معاونت سے انہیں انگلش کھلاڑیوں کو پریشان کرنے میں آسانی ہو گی۔

سپیڈ سٹار کا کہنا تھا کہ کپتان انضمام کی کپتانی میں ٹیم بہت اچھی کارکردگی دکھا رہی ہے اور امید ہے کہ ہماری ٹیم دورہء انگلینڈ سے کامیاب واپس آئے گی۔

یاد رہے کہ شعیب اختر اپنے گھٹنے اورٹخنے میں تکلیف کے سبب بھارت کے خلاف ون ڈے سیریز نہیں کھیل سکے تھے اور سری لنکا بھی ٹیم کے ساتھ نہیں جا سکے۔ فروری کے آخری ہفتے میں وہ آسٹریلیا گئے تھے جہاں ان کی سرجری ہوئی تھی۔