کوئٹہ گلیڈی ایٹرز بمقابلہ اسلام آباد یونائیٹڈ: کولن منرو اور عثمان خواجہ کی دھواں دھار بیٹنگ، صرف 10 اوورز میں میچ تمام کر دیا

پاکستان سپر لیگ میں آج اسلام آباد یونائیٹڈ اور کوئٹہ گلیڈی ایٹرز کے مابین کھیلے جانے والے میچ میں اسلام آباد نے صرف 10 اوورز میں ہی ہدف حاصل کر کے شائقین اور کرکٹ نقادوں کو حیران کر دیا ہے۔

کوئٹہ گلیڈی ایٹر نے پہلے کھیلتے ہوئے 20 اوورز میں 133 رنز بنائے اور اسلام آباد یونائیٹڈ نے یہ ہدف بغیر کسی نقصان کے 137 رنز بنا کر حاصل کر لیا۔

اسلام آباد یونائیٹڈ کی جانب سے کولن منرو نے صرف 36 گیندوں پر 90 رنز کی دھواں دھار اننگز کھیلی جس نے کوئٹہ گلیڈی ایٹرز کے جیتنے کے امکانات کو ختم کر کے رکھ دیا۔

اُن کا ساتھ عثمان خواجہ نے دیا جنھوں نے 27 گیندوں پر 40 رنز بنائے اور یوں اسلام آباد نے 10 وکٹوں سے کوئٹہ گلیڈی ایٹرز کو پچھاڑ کر رکھ دیا۔

اسلام آباد کے بولرز میں سے حسن علی، محمد وسیم اور محمد موسیٰ نے دو دو وکٹیں حاصل کیں جبکہ عاکف جاوید اور شاداب خان نے ایک ایک بیٹسمین کو اپنا شکار بنایا۔ کوئٹہ کے بولرز اسلام آباد کو صرف رنز دے پائے اور بدلے میں کوئی وکٹ حاصل نہ کر سکے۔

یہ بھی پڑھیے

’تم آؤٹ نہ دو، ہم خود ہی کر لیں گے‘

قلندرز کی آخری گیند پر جیت: ’شروع مجبوری میں کیے تھے اب مجا آ رہا ہے‘

سوشل میڈیا پر صارفین کا ردِ عمل

میچ کے اختتام کے بعد سوشل میڈیا صارفین جہاں اسلام آباد کی فتح پر جشن مناتے ہوئے نظر آئے تو وہیں کوئٹہ گلیڈی ایٹرز کے کپتان سرفراز احمد کی پریشان تاثرات والی تصاویر بھی موضوعِ گفتگو رہیں۔

عبدالماجد ہمایوں نے اسلام آباد کی جانب سے ہدف ریکارڈ دورانیے میں حاصل کرنے پر طنزیہ انداز میں لکھا کہ اسلام آباد والوں نے جلدی سونا تھا، اس لیے میچ جلدی ختم کر دیا۔

سیموئیل نامی صارف نے لکھا کہ ایک وقت تھا کہ ہر چیز سرفراز احمد کے حق میں جاتی تھی مگر اب لگتا ہے کہ حالات اُن کے خلاف ہو گئے ہیں۔ سخت کوشش کے باوجود وہ مسلسل ناکام ہو رہے ہیں اور کچھ بھی اُن کے حق میں نہیں جا رہا۔ اسی لیے آپ کو اپنی قسمت کو استحقاق نہیں سمجھنا چاہیے بلکہ اسے بہتری کے لیے استعمال کرنا چاہیے۔

حیات نے سرفراز احمد کی تصاویر پوسٹ کرتے ہوئے تاسف کا اظہار کیا۔ اُنھوں نے سرفراز احمد کو کہا کہ وہ اس موقع پر بھی مضبوط رہیں۔

ایک اور صارف نے ملتان سلطانز اور کوئٹہ گلیڈی ایٹرز کی پے در پے شکستوں پر طنز کرتے ہوئے لکھا کہ ان دونوں ٹیموں کی آپس میں ایک لیگ منعقد کروا دینی چاہیے۔ کوئی تو جیت ہی جائے گا۔

خدیجہ نے اسلام آباد یونائیٹڈ کے بلے بازوں کی شاندار کارکردگی پر تبصرہ کرتے ہوئے لکھا کہ ہم پچ پر کام نہیں کرتے بلکہ پچ ہمارے لیے کام کرتی ہے۔

زینب نے لکھا کہ کوئٹہ گلیڈی ایٹرز اب اگر آخری چار میچ جیت بھی جائیں تب بھی وہ برے مجموعی رن ریٹ کی وجہ سے شاید آخر میں ہی رہیں۔ اُنھوں نے کہا کہ نسیم شاہ کی فارم سب کے لیے خدشے کا باعث ہونی چاہیے۔