رفعت اللہ اورکزئی بی بی سی اردو ڈاٹ کام، پشاور

	قاتلوں کو گرفتار کر کے ان کو ہر حال میں کیفرکردار تک پہنچایا جائے گا

کابینہ نے صوبہ بھر میں اضلاع، تحصیلوں اور تھانوں کی سطح پر امن کمیٹیوں کے قیام کی باقاعدہ منظوری دی اور تمام ڈی سی اوز کو ہدایت کی گئی ہے کہ وہ اپنے اپنے علاقوں میں فوری طور پر امن کمیٹیاں قائم کریں جن میں تمام سیاسی جماعتوں، جید علماء کرام اور عمائدین کو نمائندگی دی جائی گی۔

پیر کو پشاور میں صوبائی کابینہ کے اجلاس کے بعد صحافیوں کو بریفنگ دیتے ہوئے صوبائی وزیر اطلاعات اور سرحد حکومت کے ترجمان آصف اقبال داودزئی نے بتایا کہ کابینہ نے تین چینی باشندوں کے قتل پر حکومت چین سے انتہائی افسوس کا اظہار کیا ہے اور اس سلسلے میں کچھ گرفتاریاں بھی کی گئیں ہیں تاہم ان کے مطابق تاحال کوئی ٹھوس شواہد نہیں ملے ہیں۔

ان کا کہنا تھا کہ لال مسجد کے حوالے سے مولانا فضل الرحمان اور وزیراعلی اکرم خان درانی کی کوششیں سب کے سامنے ہیں جن کی وجہ سے پہلے دن چودہ سو طلباء وطالبات باہر آگئے ورنہ حکومت پہلے ہی رات کمانڈو ایکشن کرنا چاہتی تھی۔

چینی سفیر کا دورہ سرحد  پاکستان میں متعین چینی سفارت خانے کے ایک اعلی سفارت کار مسٹر ماؤ نے پیر کو پشاور کا دورہ کیا اور چینی باشندوں کے قتل کے حوالے سے اعلی پولیس اہلکاروں سے ملاقاتیں کیں

ایک سوال کے جواب میں آصف اقبال نے کہا کہ امام ڈھیری سوات کے مولانا فضل اللہ ایک مرتبہ پھر امن معاہدے کی خلاف ورزی کرنے کے بعد گزشتہ روز وعدہ کرچکے ہیں کہ وہ آئندہ ایسا نہیں کرینگے تاہم اگر انہوں نے پھر معاہدے کی خلاف ورزی کی تو ان کے خلاف سخت کارروائی کی جائیگی۔

ادھر پاکستان میں متعین چینی سفارت خانے کے ایک اعلی سفارت کار مسٹر ماؤ نے پیر کو پشاور کا دورہ کیا اور چینی باشندوں کے قتل کے حوالے سے اعلی پولیس اہلکاروں سے ملاقاتیں کیں۔

انہوں نے بعد ازاں صحافیوں سے مختصر گفتگو میں بتایا کہ وہ اب تک پولیس کی طرف سے کی گئی تفتیش سے مطمئن ہیں اور ایسے واقعات سے پاک چین دوستی متاثر نہیں ہوگی۔