’صفورہ بس حملے کے ملزمان کا تعلق دولت اسلامیہ سے ہے‘
،تصویر کا ذریعہAFP
- مصنف, شہزاد ملک
- عہدہ, بی بی سی اردو ڈاٹ کام، اسلام آباد
پاکستان کے صوبہ سندھ کی پولیس کے سربراہ نے کہا ہے کہ سانحہ صفورہ میں ملوث ملزمان خود کو دولت اسلامیہ کہنے والی کالعدم جماعت کے لیے کام کرتے رہے ہیں۔
انھوں نے کہا کہ اس تنظیم کا سرغنہ اب بھی شام میں موجود ہے اور امکان یہی ظاہر کیا جا رہا ہے کہ وہ وہاں پر اسی کالعدم تنظیم کے لیے کام کر رہے ہیں۔
آئی جی سندھ غلام حیدر جمالی نے پیر کے روز داخلہ امور سے متعلق ایوان بالا یعنی سینیٹ کی قائمہ کمیٹی کے اجلاس کو بریفنگ دیتے ہوئے بتایا کہ صوبے میں گذشتہ کچھ عرصے کے دوران ہونے والے شدت پسندی کے اہم واقعات میں ملوث افراد کا سراغ لگا لیا گیا ہے۔
سانحہ صفورہ کا ذکر کرتے ہوئے اُنھوں نے کہا کہ اس واقعے میں 25 افراد کا گینگ ملوث ہے جن میں سے 14 کی شناخت ہوگئی ہے اور اُن میں سے آٹھ افراد کو گرفتار کر لیا گیا ہے۔
End of سب سے زیادہ پڑھی جانے والی
آئی جی سندھ کا کہنا تھا کہ اس واقعے میں ملوث افراد قانون نافذ کرنے والے اداروں کے علاوہ سکیورٹی فورسز کے اہلکاروں کا نشانہ بنانے کے لیے ایک فہرست تیار کر چکے تھے جن کے بارے میں سکیورٹی اداروں کے اعلیٰ حکام کو آگاہ کر دیا گیا ہے۔
غلام حیدر جمالی کے مطابق پولیس کو اطلاع ملی ہے کہ اس گروپ کا سرغنہ حیدر آباد کا ایک شخص عبدالعزیز ہے جو ان دنوں شام میں ہے اور امکان یہی ظاہر کیا جا رہا ہے کہ وہ وہاں دولت اسلامیہ تنظیم کے لیے لڑ رہا ہے۔
داخلہ امور کے بارے میں قائمہ کمیٹی کے چیئرمین اور سابق وزیر داخلہ رحمان ملک نے سندھ پولیس کے سربراہ سے کہا کہ وہ ملزم کو وطن واپس لانے کے لیے انٹرپول سے رابطہ کریں۔
اُنھوں نے دعویٰ کیا ہے کہ صوبے میں سکیورٹی کے انتظامات بہتر ہونے کی بنا پر دہشت گردی کے واقعات میں 80 فیصد جبکہ اغوا برائے تاوان کے مقدمات میں بھی 96 فیصد کمی واقع ہوئی ہے۔
