ప్రపంచంలోనే అత్యంత ఖరీదైన గులాబీ వజ్రం ఇది

అరుదైన పింక్ డైమండ్ ఒకటి కొత్త రికార్డు సృష్టించింది. 19 క్యారెట్ల బరువున్న ఈ వజ్రం ఏకంగా 50.3 మిలియన్ స్విస్ ఫ్రాంక్‌ల(సుమారు రూ.361 కోట్లు)లకు అమ్ముడుపోయింది.

దీంతో సగటున క్యారట్ విలువ భారతీయ కరెన్సీలో చూసుకుంటే రూ.18.7 కోట్లు పలికినట్లు లెక్క. ఇంతకుముందెన్నడూ ప్రపంచంలో ఎక్కడా గులాబీ వజ్రం క్యారట్ ధర ఇంత పలకలేదని వేలం సంస్థ క్రిస్టీస్ వెల్లడించింది.

స్విట్జర్లాండ్‌లో నిర్వహించిన ఈ వేలంలో అమెరికాకు చెందిన హ్యారీ విన్‌స్టన్ సంస్థ దీన్ని దక్కించుకుంది. వేలం ప్రారంభమైన 5 నిమిషాల్లోనే హ్యారీ విన్‌స్టన్ సంస్థ భారీ ధరకు దీన్ని తమ సొంతం చేసుకుంది.

కొత్త యజమానులు దీన్ని సొంతం చేసుకున్న అనంతరం 'విన్‌స్టన్ పింక్ లెగసీ' అని దానికి నామకరణం చేశారు.

దక్షిణాఫ్రికాలో పుట్టింది

చిక్కని గులాబీ వర్ణంలో ఉన్న వజ్రాలే అరుదైతే అందులో ఇంతపెద్ద వజ్రం మరీ అరుదని.. అందుకే దీనికంతటి విలువని నిపుణులు చెబుతున్నారు.

వందేళ్ల కిందట దక్షిణాఫ్రికాలోని గనుల్లో ఈ వజ్రం లభించిందని.. 1920లో దీనికి సానపట్టి ఈ రూపమిచ్చారని క్రిస్టీస్ సంస్థ తెలిపింది.

ఒకప్పుడు 'డిబీర్స్' సంస్థను నడిపించిన ఓపెన్‌హైమర్ కుటుంబం వద్ద ఇది ఉండేదని... ప్రపంచంలోని అద్భుత వజ్రాల్లో ఇదొకటని వేలంసంస్థ క్రిస్టీస్ జ్యూయలరీ విభాగా ఇంటర్నేషనల్ హెడ్ రాహుల్ కడాకియా తెలిపారు.

10 క్యారెట్ల కంటే ఎక్కువ బరువున్న స్వచ్ఛమైన పింక్ డైమండ్లు అరుదని చెప్పారు. ముదురు గులాబీ వర్ణంలో ఉన్న ఇలాంటి వజ్రాలైతే ఒక క్యారెట్ కంటే ఎక్కువ బరువున్నవి ఉండవన్నారు.

కాగా గత ఏడాది నవంబరులో 8.41 క్యారెట్ల బరువున్న పింక్ డైమండ్ ఒకటి హాంకాంగ్‌లో వేలంలో రూ.125 కోట్లకు విక్రయమైంది. అంటే క్యారెట్ విలువ సుమారు రూ.15.15 కోట్లు పలికింది. ఇప్పుడీ పింక్ డైమండ్ దాన్ని మించిపోయింది.

ఇవి కూడా చదవండి:

(బీబీసీ తెలుగును ఫేస్‌బుక్, ఇన్‌స్టాగ్రామ్‌, ట్విటర్లో ఫాలో అవ్వండి. యూట్యూబ్‌లోనూ సబ్‌స్క్రైబ్ చేయండి.)