కరోనావైరస్ హాట్‌స్పాట్లు: ఈ ప్రాంతాల్లో ఏం జరగబోతుంది? లాక్‌డౌన్‌కు, దీనికి తేడా ఏంటి?

కరోనావైరస్ వ్యాప్తిని కట్టడి చేసేందుకు దేశవ్యాప్తంగా లాక్‌డౌన్ అమలవుతోంది. తెలంగాణ ముఖ్యమంత్రి కేసీఆర్ దీన్ని మరింత పొడగించాలని ప్రధాని నరేంద్ర మోదీకి ఇటీవల విజ్ఞప్తి చేశారు. వివిధ రాష్ట్రాలు, నిపుణులు కూడా కేంద్రాన్ని ఇదే కోరుతున్నాయి.

మరోవైపు తెలంగాణలో ఇప్పటివరకూ వందకుపైగా ప్రాంతాలను కరోనావైరస్ హాట్‌స్పాట్లుగా ప్రభుత్వం గుర్తించినట్లు పత్రికల్లో వార్తలు వచ్చాయి.

హైదరాబాద్‌తో పాటు నిజామాబాద్‌, కామారెడ్డి, గద్వాల, నల్లగొండ, సూర్యాపేట, కరీంనగర్‌లో ఈ హాట్‌స్పాట్లు గుర్తించినట్లు ఆ కథనాలు పేర్కొన్నాయి.

కానీ, ఈ విషయంలో స్పష్టత రావాల్సి ఉంది. అధికారికంగా దీని గురించి ప్రభుత్వం ఇంకా ప్రకటించలేదు.

ఉత్తర్‌ప్రదేశ్, దిల్లీ రాష్ట్రాల్లో అధికారికంగా హాట్‌స్పాట్లను ప్రకటించారు. ఆయా ప్రాంతాల్లో పూర్తి దిగ్భంధాన్ని అమలు చేస్తున్నారు.

దిల్లీ ఇలా 20 ప్రాంతాలను బుధవారం అర్ధరాత్రి నుంచి సీల్ చేసింది. ఉత్తర్‌ప్రదేశ్‌లో 15 జిల్లాల్లో 104 హాట్‌స్పాట్లను గుర్తించారు.

హాట్ స్పాట్లు అంటే కరోనావైరస్ తీవ్రత ఎక్కువున్న సున్నితమైన ప్రాంతాలు.

లాక్‌డౌన్‌కు, దీనికి తేడా ఏంటి...

లాక్‌డౌన్‌లో జనాలను ఇళ్లకే పరిమితం కావాలని ప్రభుత్వం సూచించింది. వైద్యం, నిత్యావసరాల కొనుగోలు వంటి వాటికే నిర్ణీత సమయాల్లో సాధారణ ప్రజలను బయటకు వచ్చేందుకు అనుమతించింది.

హాట్‌స్పాట్లుగా గుర్తించిన ప్రాంతాల విషయమంలో మాత్రం అలా కాదు. వీటిని పూర్తిగా సీల్ చేస్తారు. రాకపోకలు పూర్తిగా ఆపేస్తారు. కూరగాయల మార్కెట్ల వంటివి కూడా నడవవు.

అక్కడుండే వారికి అవసరమైన వస్తువులు, సరుకులు, ఔషధాలు... నేరుగా ఇళ్లకే సరఫరా చేస్తారు. ప్రభుత్వాలు ఇందుకోసం కాల్ సెంటర్లు కూడా ఏర్పాటు చేస్తున్నాయి.

లాక్‌డౌన్ సమయంలో ఇచ్చిన పాస్‌లన్నింటనీ సమీక్షించి, అవసరం లేవనుకున్నవాటిని రద్దు చేస్తారు.

అత్యవసర సేవలు, మీడియాలో పనిచేస్తున్నవారిని మాత్రమే రాకపోకలకు అనుమతి ఉంటుంది.

ఏపీలో రెడ్ జోన్లు

ఆంధ్రప్రదేశ్ ప్రభుత్వం ఏ ప్రాంతాలనూ హాట్‌స్పాట్లుగా గుర్తించినట్లు సమాచారం లేదు. అయితే, కోవిడ్-19 ప్రభావం ఎక్కువగా ఉన్న ప్రాంతాలను రెడ్ జోన్లుగా గుర్తిస్తున్నారు.

విశాఖపట్నం, విజయవాడ, మచిలీపట్నం, గుంటూరు, కాకినాడ, కర్నూలుల్లో కరోనావైరస్ తీవ్రత ఎక్కువున్న కొన్ని ప్రాంతాలను రెడ్ జోన్లుగా గుర్తించినట్లు రాష్ట్ర కోవిడ్-19 నోడల్ ఆఫీసర్ అర్జా శ్రీకాంత్ చెప్పారు.

జిల్లాల వారీగా చూస్తే ఏప్రిల్ 10వ తేదీ నాటికి అనంతపురంలో మూడు, చిత్తూరులో ఏడు, తూర్పు గోదావరిలో ఎనిమిది, గుంటూరులో 12, కడపలో ఆరు, కృష్ణాలో 16, కర్నూలులో 22, నెల్లూరులో 30, ప్రకాశంలో 11, విశాఖపట్నంలో ఆరు, పశ్చిమ గోదావరిలో 12 ప్రాంతాలను రెడ్ జోన్లుగా గుర్తించారు.

ఈ ప్రాంతాల్లో లాక్‌డౌన్ కఠినంగా అమలవుతోంది. పరీక్షల నిర్వహణ కూడా ముమ్మరంగా సాగుతోంది.

కేవలం ఉదయం ఒక గంట పాటే సరుకుల కొనుక్కునేందుకు జనాన్ని బయటకు వచ్చేందుకు అనుమతిస్తున్నారు.

కోవిడ్-19 పాజిటివ్ కేసులున్న ప్రాంతం నుంచి 3 కిలోమీటర్ల చుట్టూ ఉన్న ప్రాంతాలని కంటైన్మెంట్ క్లస్టర్లుగా తీసుకున్నారు. కేసుల వ్యాప్తికి అవకాశం ఉన్న 5 కిలోమీట్ల ప్రాంతాన్ని బఫర్ జోన్‌గా గుర్తించారు. గ్రామాల్లో అయితే బఫర్ జోన్లను 7 కిలోమీటర్ల వరకూ విస్తరిస్తున్నారు.

ఈ ప్రాంతాల్లో అవసరమైన సేవలను, ప్రభుత్వ సేవలను నిర్వహించేందుకు తప్ప మరే ఇతర కారణాలతోనూ ప్రజలు బయటకు వెళ్లకుండా అన్ని జాగ్రత్తలు తీసుకున్నామని రాష్ట్ర నోడల్ అధికారి ప్రకటించారు.

అన్ని ఎంట్రీ, ఎగ్జిట్ పాయింట్ల వద్ద థర్మల్ స్క్రీనింగ్ తో పాటు కోవిడ్ పై అవగాహన కల్పిస్తున్నారు. అన్ని వాహనాల కదలికలను, ప్రజా రవాణాను నిషేధించారు.

కంటైన్మెంట్ జోన్ ను అనుసంధానించే అన్ని రహదారులనూ పోలీసులు పర్యవేక్షిస్తున్నారు.

కరోనావైరస్ హెల్ప్‌లైన్ నంబర్లు: కేంద్ర ప్రభుత్వం - 01123978046, ఆంధ్రప్రదేశ్, తెలంగాణ - 104

ఇవి కూడా చదవండి:

(బీబీసీ తెలుగును ఫేస్‌బుక్, ఇన్‌స్టాగ్రామ్‌, ట్విటర్‌లో ఫాలో అవ్వండి. యూట్యూబ్‌లో సబ్‌స్క్రైబ్ చేయండి.)