Ожонси мубориза бо фасод: “Саидов дар таҷовуз ба номус даст дорад”
Ожонси назорати давлатии молӣ ва мубориза бо фасоди Тоҷикистон гуфтааст, “шаҳрванди ноболиғе ба ин ожонс аз таҷовуз ба номусаш аз ҷониби Зайд Саидов” шикоят бурдааст.
Дар хабари ин ожонс, ки шаби панҷшанбеи 18 июл, дар сойти интернетии он мунташир шудааст, ин шаҳрванд бо номи мустаори “А” унвон шуда ва омадааст, Зайд Саидов дар манзили маскуние дар шаҳри Душанбе ин ноболиғи 14-сола, шогирди синфи ҳафтро бо машруб беҳуш карда ва ба номусаш таҷовуз кардааст.
Дар ин хабар омадааст, аз моҳи апрели соли 2008 то моҳи августи соли 2012 оқои Саидов “бо роҳи таҳдиди зӯроварӣ мунтазам алоқаи ҷинсиашро бо ин ноболиғ идома додааст.”
Бино ба иддаъои Ожонси назорати давлатии молӣ ва мубориза бо фасоди Тоҷикистон, дар ин муддат ин духтари ноболиғ се маротиба ҳомила ё бордор шуда, аммо иҷборан исқоти ҳамл шудааст.
Гуфта мешавад, Зайд Саидов ба модари ин духтар, ки аз ҳодиса огоҳ шудааст, 1300 дулор дода ва ваъдаи издивоҷ бо духтари ӯро додааст. Ин духтари ноболиғ бори чорум аз оқои Саидов ҳомила шуда ва ҳоло ӯ фарзанди 3-моҳа доштааст.
Дар иртибот ба ин ҳодиса Ожонси назорати давлатии молӣ ва мубориза бо фасоди Тоҷикистон дар қиболи Зайд Саидов бо иттиҳоми “таҷовуз ба номуси духтари баръало ноболиғ”, “алоқаи ҷинсӣ бо шахсе, ки ба синни шонздаҳсолагӣ нарасидааст” ва “ба исқоти ҳамл маҷбур сохтани зан” парвандаи ҷинойӣ боз карда ва корҳои бозрасӣ дар ин замина шурӯъ шудааст.
Аммо Исҳоқ Табаров, вакили мудофеъи Зайд Саидов гуфт, ки муваккилаш ин иттиҳомотро рад карда ва гуфтааст, ки ин духтари ноболиғро намешиносад ва бо ӯ иртиботе надоштааст.
Зимнан, Зайд Саидов, соҳибкори маъруф ва раҳбари гурӯҳи мубтакирон барои таъсиси ҳизби ҷадиди “Тоҷикистони нав” дар рӯзи 19 майи соли ҷорӣ дар фурудгоҳи шаҳри Душанбе, ба ҳангоми бозгашт аз Фаронса ба иттиҳоми ришвахорӣ, сӯйиистифода аз мақоми хидматӣ ва чандзанӣ боздошт шуда буд.
Аммо оқои Саидов ин иттиҳомотро рад карда ва гуфта буд, ки ба хотири собит кардани бегуноҳии худ аз шаҳри Порис ба Душанбе баргаштааст.
Мушкилоти Зайд Саидов, соҳибкори муваффақи тоҷик бо ниҳодҳои давлати Тоҷикистон аз эъломи тасмим барои таъсиси ҳизби ҷадиди “Тоҷикистони нав” дар 6 апрели соли ҷорӣ маншаъ мегирад.
Раҳбарони бархе аз аҳзоби сиёсӣ, аз ҷумла, Раҳматилло Зойиров, раҳбари Ҳизби сусиёл-демукроти Тоҷикистон, қазияи боздошти Зайд Саидовро “сиёсӣ” хонда ва ин иттифоқро ба тасмими ӯ барои таъсиси ҳизби ҷадиди сиёсӣ марбут хондааст.
Кумитаи дифоъ аз ҳуқуқҳои Зайд Саидов дар номае ба Созмони Милали Муттаҳид, Идораи ҳуқуқи башари Созмони Амнияту Ҳамкории Урупо, созмонҳои “Human rights watch”, “Freedom House” ва созмонҳои дигари дифоъ аз ҳуқуқи башар ва сафоратҳои кишварҳои хориҷӣ дар Душанбе ба мавориди фаровони нақзи ҳуқуқи Зайд Саидов аз замони боздошт ва нигаҳдории ӯ дар боздоштгоҳи Кумитаи амнияти миллии Тоҷикистон таъкид шудааст.
Дар ин нома аз созмонҳои байналмилалӣ ва ҷомеъаи ҷаҳонӣ даъват шудааст, то дар чорчӯби тааҳҳудоти Тоҷикистон барои таъмини ҳуқуқу озодиҳои инсон ба қазияи Зайд Саидов таваҷҷӯҳ кунанд, то ин парванда бар пояи қонунҳои ин кишвар ва мунсифона бозрасӣ шавад.