'Барканории Қудратов ба парвандаи Саидов асар нахоҳад дошт'
Зайд Саидов, вазири саноеъи вақти Тоҷикистон ки аз 19-уми майи соли ҷорӣ дар боздошт ба сар мебарад, аз кумаки ҳуқуқии Шӯҳрат Қудратов, яке аз се муваккилаш даст кашид.
Дар ин бора Шӯҳрат Қудратов иттилоъ дод.
Парвандаи Зайд Саидов, ки дар он ин тоҷири саршинос дар фасод муттаҳам мешавад, пурсарусадо буда ва Шӯҳрат Қудратов, аз миёни вукалои мудофеъи ин парванда бештар ба расонаҳои хабарӣ дар робита ба раванди таҳқиқи ин қазия гузориш медод.
Ӯ ҳамчунин мукарраран аз нақзи ҳуқуқи муваккилаш ба расонаҳои мусоҳиба медод ва ахиран дар бораи ирсоли шикоят аз бозрасони парвандаи муваккилаш ба ожонси мубориза бо фасод хабар дода буд.
Шӯҳрат Қудратов дар сӯҳбат бо Би-би-сӣ гуфт, ки ҳадс мезанад, даст кашидани Зайд Саидов аз кумакҳои ҳуқуқии ӯ, “дар натиҷаи фишор аз сӯйи бозрасон” анҷом шуда бошад "ва ё касе ба Саидов итминон додааст, ки бидуни бозтоби густрадаи хабарӣ, эҳтимоли натиҷаи мусбати парвандааш бештар аст".
Оқои Қудратов гуфт, ки оқои Саидов дар ҷараёни мулоқоти охиринаш дар боздоштгоҳ, ки дар ҳузури бозрасон анҷом ёфт, аз кори анҷомдодаи ӯ ба унвони вакили мудофеъ тақдир карда, аммо гуфтааст, ки дигар ба кумакҳои ҳуқуқии ӯ ниёз надорад.
Ҳамакнун аз Зайд Саидов дар ҷараёни таҳқиқи парванда ва муҳокимааш дар додгоҳ фақат ду вакили мудофеъ, Фахриддин Зокиров ва Исҳоқ Табаров ҳимоят хоҳанд кард.
'Ончи ҳукумат мехоҳад, он мешавад'
Дар ҳамин ҳол Ойниҳод Бобоназарова, ҳуқуқудони тоҷик ва узви Кумитаи дифоъ аз Зайд Саидов, ки дар дохили Эътилоф “Барои демукросӣ ва ҷомеъаи шаҳрвандӣ” таъсис ёфта буд, дар ин бора гуфт: “Бояд дар ёд дошт, ки ҳоло дар Тоҷикистон системи адвокатура чунон заиф аст, ки ҳатто агар беҳтарин вакили мудофеъи дунёро ба инҷо биёред, натиҷаи парванда ҳамон хоҳад буд, ки ҳукумат мехоҳад.”
Ба бовари ин ҳуқуқшиноси собиқадор оқои Қудратов аз лиҳози иттилоърасонӣ дар мавриди раванди таҳқиқи парвандаи Зайд Саидов, “корашро хуб анҷом дод" ва агар манзур аз дур кардани Қудратов аз парванда, коҳиши сарусадоҳо дар бораи он бошад, "аллакай дер шудааст, зеро ҷомеъа ба парванда таваҷҷӯҳ дорад ва аз Зайд Саидов ҳимоят мекунад."
Кумитаи дифоъ аз ҳуқуқҳои Зайд Саидов, ки хонуми Бобоназарова яке аз аъзои он мебошад, дар моҳи ҷорӣ ба манзури дифоъ аз ҳуқуқҳои оқои Саидов аз ҷумлаи рӯшанфикрон ва фаъъолони ҷомеъаи мадании Тоҷикистон ва тоҷикони бурунмарзӣ таъсис шудааст.
Зайд Саидов, вазири пешини саноеъ ва соҳибкори маъруф пас аз як моҳ аз эъломи ибтикори худ дар бораи таъсиси ҳизби ҷадиди "Тоҷикистони нав" боздошт шуда буд.
Раҳбарони бархе аз аҳзоби сиёсӣ, аз ҷумла, Раҳматилло Зойиров, раҳбари Ҳизби сусиёл-демукроти Тоҷикистон, қазияи боздошти Зайд Саидовро "сиёсӣ" хонда ва ин иттифоқро ба тасмими ӯ барои таъсиси ҳизби ҷадиди сиёсӣ марбут медонанд.
Қаблан Кумитаи дифоъ аз ҳуқуқҳои Зайд Саидов ба Созмони Милали Муттаҳид, Идораи Ҳуқуқи башари Созмони Амнияту Ҳамкории Урупо, созмонҳои "Human rights watch", "Freedom House" ва созмонҳои дигари дифоъ аз ҳуқуқи башар ва сафоратҳои кишварҳои хориҷӣ дар Душанбе номае ирсол карда ва ба мавориди фаровони нақзи ҳуқуқи Зайд Саидов аз замони боздошташ дар боздоштгоҳи Кумитаи амнияти миллии Тоҷикистон таъкид карда буд.
Дар ин нома аз созмонҳои байналмилалӣ ва ҷомеъаи ҷаҳонӣ даъват шуда буд, то дар чорчӯби таъаҳҳудоти Тоҷикистон барои таъмини ҳуқуқу озодиҳои инсон ба қазияи Зайд Саидов таваҷҷӯҳ кунанд, то ин парванда бар пояи қонунҳои ин кишвар ва мунсифона бозрасӣ шавад.