تاسې د وېبسایټ داسې بڼه ګورئ چې یوازې متن لري او لږ انټرنېټ کاروي. که غواړئ عکسونه او ویډیوګانې وګورئ، نو د وېبسایټ اصلي (لومړنۍ) بڼې ته ورشئ.
د وېبسایټ اصلي بڼې ته مې وروله
د وېبسایټ دې بڼې په اړه چې ډېر انټرنېټ نه مصرفوي نور معلومات دلته موندلای شئ.
کابل کې پر ښوونیز مرکز برید؛ یوناما وايي د وژل شویو شمېر ۴۳ ته ختلی
افغانستان کې د ملګرو ملتونو سیاسي استازولۍ (یوناما) ویلي د دوی د وروستیو شمېرو له مخې، د تېرې جمعې پر ورځ کابل کې پر کاج ښوونیز مرکز د ځانمرګي برید د وژل شویو شمېر ۴۳ او د ټپیانو شمېر ۸۳ کسانو ته لوړ شوی دی.
یوناما پر ټویټر پاڼه لیکلي چې د دوی د بشري حقونو ډلو له خوا د یاد برید د قربانیانو د ارقامو راغونډول دوام لري او امکان شته چې د وژل شویو شمېر نور هم لوړ شي.
یوناما په خپور شوي ټویټر پیغام کې برید کې د وژل شویو د تازه شمېر په اړه لیکلي:" د افغانستان پلازمېنه کې د برید قربانیانو شمېر په لوړېدو دی، ۴۳ کسان پکې وژل شوي او ۸۳ ټپیان دي چې ډېری یې تنکۍ نجونې دي، ښايي د قربانیانو شمېر له دې هم لوړ شي."
له دې وړاندې یوناما پر کاج ښوونیز مرګز برید کې د وژل شویو شمېر ۳۵ او د مړو ۸۲ کسان یاد کړي و.
یوناما له برید یوه ورځ وروسته، پر ټویټر یوه پیغام کې دا هم ویلي و چې، کابل کې د یوناما د بشر حقونو ډلې د هزاره وګړو د استوګنې سیمه کې پر ښوونیز مرکز د دقیقو مالوماتو راغونډولو کې مرسته کوي.
یوناما همدا راز زیاته کړې وه چې د ټولو قربانیانو نومونه مستندولو او یادولو ته اړتیا لري، عدالت باید پلی شي.
د تېرې (جمعه) پر ورځ د کابل لوېدیځ دشت برچي سیمه کې د (کاج) په نامه یوه ښوونیز مرکز کې د ازموینې پرمهال ځانمرګی برید وشو چې په کور دننه او بهر سخت غندل شوی.
له برید وروسته په هرات بامیان او یو شمېر نورو لویو ښارونو کې د پوهنتونونو لسګونه نجونو زده کوونکو کابل کې پر کاج ښوونیز مرکز د برید په غبرګون کې لاریونونه کړل.
په لاریونونو کې یې د "زدکړه زموږ حق دی، ټولوژنه ودروئ" شعارونه ورکول.
پلازمېنه کابل کې هم یو شمېر ښځو د یاد برید د غندنې په پار لاریون کړی و چې په افغانستان کې یې پر هزاره ګانو کېدونکو بریدونو غندنه او عدالت غوښتنه یې کوله.
لاریونوالي د طالبانو د امنیتي کسانو په پرلپسې هوايي ډزو وترهېدې او لاریون یې نیمګړی پاتې شو.